airplanebooksbriefcase business cogs cross election entertainment fish house law lockmedicalpeopleselfservices socialtax

Pissassarfimmi ataqatigiinneq

7. december 2021
Pissassarfimmi ataqatigiinneq

Pissassarfiup ineqarfittaani ataqatigiinneq 

Uku assimi takusinnaasasi, tassaapput illoqarfinnit assigiinngitsunit Pissassarfimmut sungiusariartut, taakkunaniippullu angutit sisamat assigiinngitsunik inuunerminni unammillernartitaqalersimasut. Taakkunani marluk qaratsamikkut milikartoornikuupput, ataaseq Parkinsonimik napparsimalersimavoq ataaserlu qaratsamigut aanaartoornikuulluni. 

Taakku qanigisaminnik ingiallorteqarlutik Sisimiunut Pissassarfimmut tikipput, imminnullu aatsaat takugaluarlutik ilisarisimalerlutik aallaqqipput.

Tamarmik Pissassarfimmiinnerminni Pissassarfiup ineqarfittaani najugaqarput. Pissassarfiup najugaqarfittaa Pissassarfimmut illorsuarmut atavoq, najugaqartullu immikkut ineeraqaraluarlutik aamma ataatsimoortarfimmik inersuaqarmat igaffeqarlunilu taakkunani ataatsimoorsinnaasarput, taamaalillutik ikioqatigiillutik igasarput torersaallutillu aammalu sammisaqaqatigiissinnaallutik.

Ulluinnarni suliffiusuni tamarmik immikkut timimik sungiusaasumik, pillorissaasumik perorsaasumillu sammineqartarput passunneqarsinnaallutillu. Taakkulu saniatigut aamma ataatsimut sammisaqartinneqartarlutik.

Pissassarfimmi sulisuulluni qujanartaqaaq tusarlugu pissassariartut pissarsiaqarsimallutik angusaqartutullu misigalutik aallartarmata. Aammattaaq qujaruttarpagut siunnersuuteqaraangata maaniinnerminni iluaagisaqarsimagunik iluaagisaqarlutik oqaraangata, taamaalilluta tikittussanut allanut iluaagineqarsimasut pinaveersaartissagatsigit.

Pissassarfimmut innersuunneqassagaanni Kommunimi innarluutilittut nalunaarsorneqaqqaartariaqanngilaq. Inuuninni ulluinnannilu innarluuteqarnerit peqqutaalluni unammillernartitaqalersimaguit kommunimi sullissisut attavigisinnaavat Pissassarfimmullu innersuunneqarumallutit.

Siunnersorneqarnissamik pisariaqartitsigussi apeqqutissaqarussiluunniit saaffiginninnissassinnut tikilluaqqusaavusi, ulluni suliffiusuni nalunaaqutaq 09:00-15:30 iluani, imaluunniit uunga mailerlusi: pissassarfik@nanoq.gl