airplanebooksbriefcase business cogs cross election entertainment fish house law lockmedicalpeopleselfservices socialtax

Inunnik innarluutilinnik naapeqatigiisitsinermi meeqqat qaratsamikkut innarlersimasut (CP) -Angajoqqaavi aamma qatanngutai naapeqatigeeqqammerput

17. oktober 2022

Ilaqutariiaat sisamat CP-qartumik meerartallit ulluni 11-13 oktober 2022 Pissassarfimmi naapeqatigiipput.

Pissassarfik ukiumut marloriarluni inunnut innarluutilinnut naapeqatigiisitsinermik ingerlatsisarpoq. Ukiaq mannalu meeqqat 0-13 ukiullit CP-qartut ukkatarineqarput, angajoqqaat aamma qataanngutaasut 0-13-inik ukiullit ilanngullugit,  Nuna tamakkerlugu neqerooruteqarnermi peqataarusullutik nalunaarsimasut naapisinneqarput.





Cerebral Parese (CP) tassaavoq meeqqap naarmiuunermini, inunngornermini inoorlaajunerminiluunniit qaratsakkut innarlernera, ukunannga tunngaveqarsinnaasoq:

• Inorluni inunngorneq
• Aanaartoorneq milikartoornerluunniit
• Silaannarmik amigaateqarsimaneq
• Aseruuttoorneq

Ajoquserneq ataavartussaagaluartoq, sungiusarnermi angusaqarluartoqarsinnaavoq.

Ulloq siulleq Elsass Fondimiit nittartakkatigut attaveqaat aqqutigalugu saqqummiisoqarpoq. Elsass Fonden tassaavoq aningaasaateqarfik namminersortumik ingerlasoq Danmarkimi CP-rtut, qanigisaasalu pitsaasumik atugaqarnissaanik suliniuteqartut.

Pissassarfimmi naapeqatigiinnermi meeqqat angajoqqaallu immikkut ataatsimullu ullaap tungaani ualikkullu sammisaqartinneqarput, angajoqqaat CP pillugu saqqummiivigineqarput CP-qartut periarfissaannik saqqummiussisoqarlunilu eqqartorneqarpoq: meeraaneq, atuarfik, sunngiffik, meeqqat atuarfianniit naammassinermi periarfissat.

Angajoqqaajulluni CP-qartumik meerartaqarluni naapeqatigiinneq iluarisimaarneqarpoq.



“Uatsitut innarluutilimmik meerartaqartut allat naapillugit  tarrarsorfissaqalerneq, paaseqatigiissinnaaneq assut iluarpoq,  iluarujussuarpoq. Paasissutissat tunniunneqartut annertupput,  namminerlu periarfissanik ujaasisinnaaneq paasisaqarfigivarput.  Ilaqutariittut naapeqatigiinnerput avitseqatigiiffiulluarpoq.”- Taama oqaaseqarput angajoqqaat naliliinerminni.

Naapeqatigiinneq una iluatsillugu CP-qartunut angajoqqaajusut innarluutilimmik meeraqarluni kiserliornarsinnaammat, nuna tamakkerlugu Facebook aqqutigalungu naapittarfissamminnik pilersitsipput, pilersitsinermi anguniagaavoq avitseqatigiinneq, kaammattueqatigiinneq, periarfissanillu imminnut qanimut tuniorarsinnaanissartik.

Kikkulluunniit angajoqqaajusut, akisussaasut CP-qartumik meerartallit quppernermut ilanngussinnaapput:

“CP Kalaallit Nunaanni/Grønland”

Pissassarfimmiit nuannaarutigivarput ilaqutariiaat naapisitsinerput iluarisimaarmassuk, tunniussagullu naammagisimaarmatigit. Neriuppugut paasisatik, ataatsimoornerlu pigiligartik siunissami atorluarumaaraat.