Gerluf Nykjær nulialu.
Gerluf Nykjær Maniitsormiuuvoq 58-nik ukiulik, ukioq manna pissassariartut siulliit ilagivaat, aalisartutut inuussutissarsiuteqarsimavoq maannalu siusinaartumik soraarnerussutisiaqarpoq.
Novemberi 2022 Gerluf innarluutigilikkaminik qaratsamigut aanaartoorlunilu milikartoorpoq. Qaratsamigut innarlernerata kingunerisaanik timaa saamerleq nukillaanganerulerpoq, sinnarluteqalerneq aamma oqaatsitnik oqaatigininniarnera arriillivoq.
”Aallaqqaammut annikilliornarpoq, qarasaq soorlu tamarmi matoqqasoq. Eqqarsarsinnaanera soorlu nukillaangasutut ittoq. Oqalunniarnikkut malinnaasinnaajunnaaraangama annilaanganeq nikallunganerlu takkuttarput. Qujanartumik aanaartoornerma kingorna, nuliama eqqaamanninniarninnik oqalunniarnikkullu ikiorluarpaanga tapersersorlungalu”
Gerlufip anaanaa aamma aanaartoornikuusimavoq, anaanamilu aanaartoornerata kingorna sungiusarneqartarneranik peqatigisarsimavaa. Nammineq aanaartooreernermi kingorna Nuummut nakorsiarnermini sungiusarluni aallartikkami anaanami sungiusarnerani malinnaasarsimanini sungiusarnermini iluaqutigilluarsimavaa. Maanna qaratsakkut innarlersimanerminik qangatut pisinnaajunnaarnini ilinniarpaa.
”Pissassariarninni ilisimalerpara sungiusarninni piffissap ilaani siuariaateqarlungalu kinguariaateqartassallunga. Tamanna qarasakkut innarlersimanermi aqqusaarneqartartoq paasivara. Qangatut pisinnaannginnera sungiunniarpara, killiffiga aallaavigalugu ingerlavunga.”
Gerluf pissassariarnermini nuliani ikorfartortitut ilagivaa.
”Maaniinnitsinni pissarsiaqarluarpugut, naak nuliara innarluuteqaraluarluni tapersersorluaqaanga, nuliamalu nersualaartarpaanga iluaqutissannik pissarsiaqarsimagaangama. Pissassarfimmiinnitsinni allanik pissassariartunik naapitsillunga, paaseqatigiilluta eqqartueqatigiissinnaanerput iluaqaaq. Kissaatiginarpoq illoqarfitsinni aamma aanaartoorsimasunik allanik naapeqateqarsinnaaneq. Pissassarfimmut pilertortumik sungiusariarnera iluaqutigeqaara, naak qitiluttuugaluarlunga sungiusaatit aallartinnerani sakkussannik pissarsilluarpunga. Maaniinninni nammineq timera atorlugu nukit pinngortinnissai ilikkarpara. Isumalluarnaqaaq piumassusininnarlunilu. Maniitsumut angerlaruma ilitsersuutit pissarsiakka malillugit pissassarlunga sungiusarnissara erinigeqaara. Tullinnguuppoq qarasaasiat assigisaasalu atuleqqinnissaanut sungiusarnissaq, nipilersukkat nuannaringakkit siutima illua tusillakkaluartoq tusarnaaqqittalissaanga. Qujanartorujussuuvoq nunatsinni Pissassarfik sungiusarfissatut periarfissaammat, iluaqutigeqaara. Pissassarfimmut pissassariarluni pissatsisimaarnaqaaq."-Taama oqaaseqarpoq Gerluf Nykjær