Sammisaq: Timikkut isumaliortaatsikkullu innarluutilimmik qitornaqarnermi angajoqqaatut misigissutsikkut inooqataanermilu oqimaassinnaasunik atugaqartitsisarnera
Piffissami: Sap.ak. 22, ulluni 29.-30.-31. maaji 2024
Sumiiffissaq: Pissassarfik, Sisimiut
Peqataasinnaasut: 20
Sullinniakkat: Angajoqqaat innarluutilinnik qitornallit
Qinnuteqarfissaq: Kingusinnerpaamik ulloq 15. apriili 2024. Malugiuk: Qinnuteqarfissap ullua qaangiuppat aatsaat naapeqatigiisitsinermut peqataasussat nalunaarfigineqassammata.
Naapeqatigiinneq: Kalaallisut ingerlanneqassaaq
Inuit innarluutillit naapeqatigiisinneqarnissaat nuna tamakkerlugu neqeroorutaavoq ulluni pingasuni sivisussusilik, ukioq mannalu angajoqqaat aamma angajoqqaat sinnerlugit nakkutiginnittunut innarluutilinnik meeralinnut neqeroorutaalluni.
Nassuiaat:
Innarluutilimmik qitornaqarnermi misigissutsikkut sakkortuumik eqquisinnaasarpoq, tamannalu eqqumaffiginngikkaanni imminermut, ilaqutariinnermut inuiaqatigiinnut aammalu pisortanut kalluaasinnaasarpoq.
Angajoqqaatut imaluunniit angajoqqaat sinnerlugit nakkutiginnittutut eqqarsaatersuutigineqakulasarpoq siunissami qanoq pisoqarumaarnera aamma pisuusutut misigineq imminullu assuarlerneq. Meeqqamut nalliginninneq peqqutaalluni killiliisinnaaneq ajornakusoortinneqalertarpoq taamaasilluni ilaatigut meeqqamut akisussaaffiiaanermik kinguneqartarluni.
Aamma ilaatigut meeqqamut innarluutilimmut angajoqqaajulluni killeqalersinnaasarpoq, tassa qatanngutaasut pisariaqartitaannik tunniussaqarnissaq eqqumaffigineqanngitsoorsinnaasarmat.
Angajoqqaatut, angajoqqaat sinnerlugit nakkutiginnittutut aammattaaq inooqatigiinnermi ajornartorsiutit aamma ilaqutariinni ajornartorsiutit pilersinnaasarput.
Pisortanit sullinneqarneq ilinnut misigissutsikkut nukinnik atuinarsinnaavoq, aamma angajoqqaatut imaluunniit angajoqqaat sinnerlugit nakkutiginnittutut eqqortumik sullinneqarnissat pingaaruteqarpoq, tamanna naapeqatigiinnermi eqqartorneqartussat ilagivaat.
Naapeqatigiisitsineq psykoterapeut Elisabeth P. Wille suleqatigalugu kalaallisut ingerlanneqassaaq.
Qinnuteqarnermut ulloq killiliussaq qaangiutereerpoq.
Naapeqatigiisitsinissamut neqeroorut PDF-filiusoq aajuk:
Innarluutillit naapeqatigiisinneqarnissaannut meeqqat innarluutillit angajoqqaavinut imaluunniit angajoqqaat sinnerlugit nakkutiginnittunut naapeqatigiisitsinermik neqeroorut.
Angalaneq aningaasartuutillu:
Illoqarfimmit allamit peqataasussat naapeqatigiinnissap allartiffissaa ullormik sioqqullugu tikissapput, naapeqatigiisitsinerlu naammassippat aqaguani aallaqqillutik. Taamaakkaluartoq angalatitsivinnit ullut angallavissat apeqqutaallutik tikiffissat aallarfissallu allaanerusinnaapput. Najukkamiit Sisimiunut uterlugulu bilitsi, naapisitsinermilu ineqarneq nerisaqarnerlu Pissassarfimmit akilerneqassapput.
Malugeqquneqarpoq bilitsit akikinnerpaat allanngortinneqarsinnaanngitsut atorneqarumaarmata. Peqataasussat, billetsit inniminnerneqareersut akuerineqareernerisa kingorna taamaatiinnartut allannguiniarnerannulluunniit aningaasartuutaasinnaasut namminneq nammattariaqassavaat.
Sisimiunut tikinnermi Pissassarfimmit aaneqassaatit.
Angalanermi aningaasartuutit ass. taxarneq ullormusiallu Pissassarfimmut attuumassuteqanngillat.
Apeqqutissaqarnermi attavissat:
pissassarfik@nanoq.gl imal. oqaras. 34 50 70.