airplanebooksbriefcase business cogs cross election entertainment fish house law lockmedicalpeopleselfservices socialtax

Pissassarfik pillugu 

Pissassarfik tassaavoq nuna tamakkerlugu innarluutilinnik sullissisoq Sisimiuni inissisimasoq, taanna sulianut tunngasunut ilitsersuinermik, siunnersuinermik, nalilersuinermik, ilinniartitsinermik, pikkorissarnernik, timikkut eqqarsartaatsikkullu, oqalunniarnikkut- oqaatsitigut innarluutilinnut tunngatillugu timigissarnermik sungiusarnermillu neqerooruteqartarpoq.

Neqeroorut inunnut innarluutilinnut (meeqqanut inuusuttunullu kiisalu inersimasunut), ilaqutaasunut aamma inunnut sulialinnut pineqartumi sulisunut sammititaavoq. 

Pissassarfiup inuit immikkut suliallit sumiiffimmut ataatsimut katersorpai, taamaalillunilu tamakkiisumik isigisumik aaqqiissutinut, ilisimasat ineriartortinnerinut aamma inuit suliallit assigiinngitsut ilisimasanik ingerlatseqqiinissaannut periarfissamik tunniussivoq.

Pissassarfiup siunertaa tassaavoq innuttaasut innarluutillit inuunerannik pitsanngorsaanissaq siunertaqarluartumillu inuunissamut periarfissiinissaq. ICF-imi maleruagassiat aamma Naalagaaffiit Peqatigiit innarluutilinnut isumaqatigiissutaat naapertorlugit innuttaasoq qanimut oqaloqatigisarparput, matumani inuit ataasiakkaat piviusorsiortumik anguniagassaasa aalajangersarnissaat siunertaralugu.

Innuttaasup ulluinnarni atugarisat aallaavigalugit pissassarfimmiinnissaq atuutsitsilernissarlu Pissassarfimmut tunngaviusumik tunngavissaatitaavoq. Angerlarsimaleruit illit nammineq sungiusarnerit piginnaasatillu nutaat aamma illit meeqqavilluunniit angoreersimasasi ingerlatiinnassavatit attattuarlugillu.

*ICF tassaavoq nunani tamalaani assigiiaartumik ingerlatseriaaseq, inuup timaanut, sammisartagaanut peqataasarneranullu sammititaasoq

INUK AAMMA INNAARLUUT

Innarluut pillugu oqartoqaraangat, timip eqqarsartaatsilluunniit atorsinnaanerata appasinnera oqaatigineqarajuppoq. Pissassarfimmi inuk unammilligassallu taassuma pigisai pillugit oqattarnissaq ornigineruarput. Tassami innarluutip inuk kinaassusiliinnartanngilaa, inuup innarluut aamma ilisarnaasertarpaa. Anguniagarput tassaavoq inuit ataasiakkaat taassumalu attaveqarfii tapersersussallugit matumani nammineerluni unammilligassaminik aallussilluarnissaminut pitsaanerpaanik tunngavissanik tuninissaa siunertaralugu. Taamaattumik pissassarfimmiinnissaq inunnut ataasiakkaanut taakkulu unammilligassaannut inuunerminni atugaannut naleqqussarlugu pilersaarusiortarparput, naggataatigummi inuit ataasiakkaat tassaapput taakku inuunertik naallugu unammilligassaminnik aqqusaagaqartussat.

Assersuutigalugu qaratsanni akornusernerup kingorna singernilulersimaguit, singernermut qerattaqqummik tuniinnarnissat matumani iliuusissaanngilaq. Matumani innarluuteqarnermi malitsiusartut ajornarsorsiutit aamma iliuuseqarfigineqartussaapput. Tassaasinnaapput pisunniarnermi ajornartorsiutit, sulisinnaanerup apparnera, nikallungarujussuarnerit il.il.

Pissassarfiup kissaatigaa Inuit innarluutillit pisinnaatitaaffii pillugit Naalagaaffiit Peqatigiit isumaqatigiissutaannik eqquutsitsinissaq

 

Isumaqatigiissutip matuma siunertaraa inuit innarluutillit tamarmik inuit allat assigalugit inuit pisinnaatitaaffiinik tunngaviusumillu kiffaanngissuseqarnissamut pisinnaatitaaffinik tamanik atuisinnaanerisa siuarsarneqarlutillu illersorneqarnissaat periarfissaasalu qulakkeerneqarnissaat aamma soorunami ataqqinassuseqarnerisa siuarsarneqarnissaa. Inunnut innarluutilinnut ilaapput inuit timikkut, tarnikkut, silassorissutsimikkut imaluunniit misigissutsimikkut piginnaanikillisimasut, piginnaasanik mattussisut allat sunneeqataanerisigut inuit allat assigalugit inuiaqatigiinni tamakkiisumik peqataasinnaanerannik akornusiisinnaasut.
Inuit innarluutillit pisinnaatitaaffii pillugit Naalagaaffiit Peqatigiit isumaqatigiissutaannit, artikel 1: