Pissassarfiup pikkorissaatitsineri naapisitsinerilu

Innarluutillit naapisinneqarnerat

Pissassarfik ukiumut marloriarluni inunnut innarluutilinnut naapisitsinermik ingerlatsisarpoq. 
Pisumiit pisumut qulequtarineqartoq allanngortarpoq. 

Qulequtaq ilinnut naleqquppat, innarluutillit naapisinneqarnissaanni peqataanissaq pillugu qinnuteqarnissamut kommunimi sullissisut attavigissavat. 

Innarluutillit naapisinneqarneranni peqataaneq akeqanngilaq. Pissassarfiup aamma angalanissat, nerisaqarneq ineqarnerlu isumagissavai. 

Innarluutillit naapisinneqarneranni peqataanissat ilinnut naleqquttuunersoq annertunerusumik paasisaqarfigiumagukku allanilluunniit apeqqutissaqaruit sukkulluunniit attaveqarfiginissatsinnut tikilluaqqusaavutit.

Periuseq
Innarluutillit naapisinneqarnneranni qulequtarineqartoq ilinnut sammititaq takugukku peqataaffiginissaalu kissaatigigukku, kommunimi sullissisunnut saaffiginnissaatit.
Innarluutillit naapisinneqarneranni peqataasinnaajumallutit pisariaqartikkukku tapersersortivit ilaatinnissaanut periarfissaqarpoq. 
Innarluutillit naapisinneqarnerinut peqataanissamut immersuiffissaq allagarsiussat ataasiakkaani nassaarisinnaavat.

• Innarluutillit naapisinnissaat pillugu nassuiaat aamma peqataanissamut immersuiffissaq sukumiisumik atuakkit

• Peqataanissamut immersuiffissaq immersorneqassaaq aamma ilinnit kommunimilu sullissisunnit atsiorneqassalluni Pissassarfimmullu mailerutigineqassalluni

• Peqataanissamut nalunaarfissaq qaangiuppat innarluutillit naapisinneqarnissaannut ilaanissannut akuerineqarsimanerit akuerineqarsimannginnerilluunniit pillugu ilisimatinneqarumaarputit 

  • Illoqarfigisavit avataani illoqarfimmi allami innarluutillit naapisinneqarnerat ingerlanneqassappat, angalanissat ineqarfigisassallu pillugit paasissutissat ilinnut mailikkut nassiunneqassapput 

Pissassarfik innuttaasunut aamma  inunnik innarluutilinnik sullissisunut, ilinniagaqarsimasunut ilinniagaqarsimanngitsunullu pikkorissartitsisarpoq. 

Pikkorissarnerit ilaat sulisutsinnit misilittagalinnit ingerlanneqartarput ilaalli ilinniartitsisartunit avataaneersunit ingerlanneqartarlutik. 

Pikkorissarnerit Pissassarfimmi Sisimiuniittumi ingerlanneqartarput. Pisuni immikkut ittuni pikkorissarnerit sinerissami ingerlanneqartarput. 

Pikkorissarnerit akeqanngillat. Pissassarfiup angalanermi billetsit, nerisaqarneq najugaqarnerlu aamma akilertarpai. 

Pikkorissarneq ilinnut naleqquttuunersoq naleqquttuunnginnersorluunniit nalornissuteqaruit imaluunniit pikkorissarnissat pillugit apeqqutissaqaruit saaffiginnissinnaavutit.

Pikkorissarnerit pisussat pilersaarutaasut ataanni, illit suliannut suliassaqarfinnullu pikkorissarnissamut tunngasoq peqataaffigerusutat takugukku aqutsisut attavigiuk. Aqutsisuit pikkorissarneq qinnuteqarfigisat akuerisussaavaa.

• Pikkorissarnermut nassuiaat peqataanissamullu immersuiffissaq sukumiisumik atuakkit

• Pikkorissarnermut nassuiaammi peqataanissamut piffissaliussaq maluginiaruk

• Peqataanissamut immersugaq atsiornikoq Pissassarfimmut mailikkut nassiuguk

Peqataanissamut immersuiffissaq pikkorissarnernut neqeroorutini tamani nassaarisinnaavat.

Peqataanissamut killiliussaq qaangiuppat, pikkorissarnermi ilaanissamut akuerineqarsimanerlutit akuerineqarsimannginnerlutilluunniit ilisimatinneqassaatit.

Pikkorissariassaguit, angalanermi billetsissat ineqarnissallu pillugit paasissutissat mailikkut nassiunneqassapput. 

Allannguutit 
Pikkorissarnermut peqataasussanngornivit kingorna pissutsit atukkatit allannguuteqarpata (nuunneq, suliunnaarneq assigisaalu), sapinngisamik piaartumik Pissassarfimmut tamanna nalunaarutigissavat uunga pissassarfik@nanoq.gl