Suliffeqarfinnut namminersortunullu ussersuutit atorlugit oqalutseqarneq

Ussersuutit atorlugit oqalutseqarnissamik pisariaqartitsivit?

Suliffeqarfittut namminersortutulluunniit ingerlatsisuuguit, ilaatigut pisariaqalersinnaavoq innuttaasumik ussersuutit atorlugit attaveqartartumik attaveqaqateqassaguit ussersuutit atorlugit oqalutseqarnissat.

Ilaatigut ukunani pisuni tamanna pisariaqalersinnaavoq:

• sullitat suleqatigisalluunniit ataatsimeeqatigineranni

• ussersuutinik atuisunik sulisunik oqaloqatiginninnermi

• pisortatutk oqartussaqarfinnik ataatsimeeqateqarnermi

• pikkorissaanerni ilinniartitsinernilu

• sulinermut atatillugu ataatsimiinnerni

• pisuni allani, ussersuutit atorlugit oqalutseqartariaqarfinni

Kiap oqalutsi inniminnissavaa?

Suliffeqarfittut namminersortutulluunniit suliffeqarfimmut tunngasumik oqalutsimik pisariaqartitsiguit, illit nammineq ussersuutit atorlugit oqalutsimik nassaarnissat inniminniinissallu akisussaaffigaat.

Aamma oqalutsimik inniminniinnginnermi aningaasartuutit qanoq akilerneqarnissaat inissereertussaavat.

Ima iliussaatit

1. Piffissamik isumaqatigiissusiorit

Ataatsimeeqateqarnissamut oqaloqatiginninnissamulluunniit ullormik nalunaaquttamillu isumaqatigiissusiorit.

Ussersuutit atorlugit oqaluttaasartumik inniminniinissamut piffissaqarnissaq eqqarsaatigineqassaaq.

2. Ussersuutit atorlugit oqaluttaasartumik ujarlerit

Toqqaannartumik ussersuutit atorlugit oqaluttaasartumut attaveqarsinnaavutit imaluunniit ussersuutit atorlugit oqaluttaasartumut innersuunneqarnissannut periarfissatit paasiniarlugit TIlioq attavigalugu.

Ussersuutit atorlugit oqaluttaasartunut allattorsimaffik ataaniittoq takujuk.

3. Akigititaasut akiliinissarlu paasiniakkit

Oqalutsi inniminnilersinnagu akiliutissaq akiliinissamullu atugassarititaasut isumaqatigiissuteqarfigeriissavatit.

Taamaatitsinissamuttaaq malittarisassat eqqumaffigissavatit. Isumaqatigiissutaasoq kingusinaarluni taamaatinneqarsimatillugu, piffissamut inniminnikkamut akiliisitsinissaq attatiinnarneqarsinnaavoq. 

4. Najuulluni onlinekkulluunniit oqalutseqarnissaq toqqaruk

Najuulluni oqalutseqarnissaq periarfissaanngippat, onlinekkut ungasianiit ussersuutit atorlugit oqalutseqarsinnaavutit.

Uku atorlugit ingerlanneqarsinnaavoq:

• qarasaasiaq

• tablet/iPad

• atortorissaarut alla assiliissuteqarlunilu internetsimut attavilik

Ussersuutit atorlugit attaveqartartup oqalutsi isigilluarsinnaaniassammagu, pitsaasumik internetsimut attaveqarnissaq qulakkeeruk.

Ussersuutit atorlugit attaveqartartoq suliffinnut saaffiginnippat

Sullitaq ussersuutilluunniit atorlugit attaveqartartoq alla, suliffeqarfinnut ussersuutit atorlugit oqalutseqarnissamik pisariaqartitsisoq saaffiginnippat, eqqumaffigisariaqarpat pisortanit ikiorsiissutiniit oqalutseqarnermut tapiissuteqartoqarnissaanut periarfissaqarmat.

Ussersuutinik atuisup tapiiffigineqarnissaminut periarfissani misissorniarlugit sullissisuni attavigisinnaavaa.

Allattorsimaffik

Maja Steffens Skærlund - Ussersuutit atorlugit oqaluttaanissamut misilitsissimasoq

Ussersuutit atorlugit oqaluttaaneq & Tegn Til Tale-mullu pikkorissaaneq aamma kalaallisut danskisullu ussersorsinnaaneq

Sumiiffik: Nuuk

Nuummi najuulluni oqalutseqarnissaq periarfissaasinnaavoq. Sumiiffinni allani onlinekkut oqalutseqarneq ingerlanneqartarpoq.

Attavissaq:

E-mali: majasteffens@gmail.com

Oqarasuaat: +299 29 13 37

Tilioq

Ussersuutit atorlugit oqaluttaasartunut Tilioq innersuussisinnaallunilu inniminniissussisinnaavoq.

Pisariaqartitsinermi Tilioq uunga allaffigalugu attavigineqarsinnaavoq.:

info@tilioq.gl

Taava ussersuutit atorlugit nutserisinnaasumut innersuussillunilu ataatsimiinnissamut linkimik  Tilioq nassiussisinnaavoq.

Eqqaamajuk

Ussersuutit atorlugit oqalutsimik inniminniilersinnak:

• Ullormik nalunaaquttamillu isumaqatigiissuteqaqqaarit.

• Ussersuutit atorlugit oqalutsimik ujarleqqaarit.

• Akigititassaq paaseqqaaruk. 

• Kina akiliissanersoq inisseqqaaruk.

• Taamaatitsinissamut malittarisassat eqqumaffigikkit.

• Onlinekkut oqalutseqarneq ingerlanneqassappat atortorissaarutit pisariaqartut atorneqartussat qulakkeeqqaakkit.