Sullissisutut pisortaniluunniit atorfilittut ussersuutit atorlugit oqalutseqartarneq

Sullissisutut pisortaniluunniit atorfilittut ussersuutit atorlugit oqalutsi ima atussavat

Sullissisutut pisortaniluunniit atorfilittut innuttaasumik ussersuutit atorlugit attaveqartartumik attaveqarfigisaqarniaruit, innuttaasup paasisinnaasaanik attaveqatigiinneq ingerlanneqartariaqarpoq.

Pisuni taama ittuni ussersuutit atorlugit oqalutsimik atuisinnaavutit.

Ussersuutit atorlugit oqalutseqarneq ilaatigut ukunani pisuni atorneqarsinnaavoq:

• innuttaasoq ataatsimeeqatigissagaanni

• sullissinermut atatillugu oqaloqatigiinnermi

• oqarasuaatikkut onlinekkulluunniit ataatsimiinnermi

• innuttaasumut ilitsersuussinermi paasissutissiinermilu

• suliassaqarfimmi ilinniarsimasunik allanik ataatsimeeqateqarnermi

• pisuni allani, innuttaasumik ussersuutit atorlugit attaveqartartumik attaveqarniartillutit oqalutseqartariaqarfinni

Kia oqalutsi inniminnissavaa?

Pisortaqarfiit oqartussaqarfiusut ussersuutit atorlugit attaveqartartumik attaveqarfiginnissagunik, taava qulakkiigassaraat attaveqaqatigiinnermi pisariaqartinneqartut inissaminiinnissaat.

Innuttaasoq ussersuutit atorlugit oqalutsimik ujarlertussaanngilaq akiligaqartussaananilu, attaveqarfiginiarneranni oqalutseqarnissaq pisortaqarfinnit oqartussaqarfiusunit pisariaqartinneqarpat.

Ima iliussaatit

1. Innuttaasoq piffissamik isumaqatigiissuteqarfigiuk

Innuttaasup ataatsimeeqatiginissaanut oqaloqatiginissaanulluunniit ullormik nalunaaquttamillu isumaqatigiissusiorit.

Ussersuutit atorlugit oqaluttaasartumik inniminniinissamut piffissaqarnissaq eqqarsaatigiuk.

2. Ussersuutit atorlugit oqaluttaasartumik inniminniigit

Ussersuutit atorlugit oqaluttaasartoq imaluunniit ussersuutit atorlugit oqaluttaasartunut attaveqartitsisinnaasoq attavigiuk.

Ilaatigut ukununnga periarfissaqartarpoq:

• najuulluni ussersuutit atorlugit oqaluttaaneq

• onlinekkut ungasianiit ussersuutit atorlugit oqaluttaaneq

Ussersuutit atorlugit oqaluttaasartunut allattorsimaffik ataaniittoq takujuk.

3. Akiliinissaq qulakkeeruk

Oqalutsi inniminnilersinnagu. oqaluttaanermut aningaasartuutit oqartussanit akilerneqarsinnaanissaat qulakkeeqqaaruk.

Oqalutsip akigititai taamaatitsinermilu atugassarititai atuuttut eqqumaffigikkit.

4. Ataatsimiinnissamut paasissutissat nassiutikkit

Ataatsimiinnerup qanoq ingerlanissaa pillugu ussersuutit atorlugit oqalutsi isumaqatigiissuteqarfigiuk, paasissutissallu aammalu allakkiat pisariaqarsinnaasut piffissaalluartillugu nassiutikkit.

Ataatsimiinneq onlinekkut ingerlassappat, peqataasut tamarmik atortorissaarutinik pisariaqartunik internetsimullu attavimmik aalaakkaasumik peqarnissaat qulakkiissavat.

Onlinekkut ungasianiit ussersuutit atorlugit oqalutseqarneq

Najuulluni ussersuutit atorlugit oqalutseqarnissaq periarfissaanngippat, ataatsimiinneq onlinekkut ingerlanneqarsinnaavoq.

Ungasianiit ussersuutit atorlugit oqalutseqarneq assersuutigalugu ima ingerlanneqarsinnaavoq:

• qarasaasiakkut

• tablet/iPad atorlugu

• atortorissaarut alla assiliissuteqarlunilu internetsimut attavilik atorlugu

Ussersuutit atorlugit attaveqartartup, oqaloqatigiinneq tamaat oqalutsi ersarissumik isigisinnaassagaa qulakkeeruk.

Ussersuutit atorlugit attaveqartartunik ataatsimeeqateqarnermi pingaarutilik

Ussersuutit atorlugit oqaluttaaneq pisortatut oqartussaqarfiup innuttaasullu akunneranni attaveqaqatigiinnermut ilaavoq.

Taamaammat eqqaamajuk:

• innuttaasoq toqqarlugu oqaluutissagakku – oqalutsiunngitsoq

• pissusissamisoortumik unikaallalaartarit. oqalutsi oqaloqatigiinnermut malinnaatikkumallugu

• innuttaasup paasissutissat pingaarutillit paasinerai qulakkiissagakku

• pisariaqarpat paasissutissat allakkiallu naleqquttut innuttaasumut siusinaartumik nassiutissagakkit

• oqalutseqartoqarnera pissutigalugu ataatsimiinnerup sivisuneroratarsinnaanera eqqumaffigissagakku

Kina akiliissava?

Pisortat oqartussaqarfiusut innuttaasumik ussersuutit atorlugit attaveqartartumik attaveqaqateqarniarnerminnut atatillugu ussersuutit atorlugit oqalutsimik pisariaqartitsigunik, taava oqartussaqarfiup oqalutseqarnissamut aningaasartuutit akilerneqarnissaat qulakkiigassaraa.

Oqartussaqarfiup sullissineranut atatillugu ussersuutit atorlugit oqalutsimik pisariaqartitsisoqartitsinerup akilerneqarnissaanut innuttaasoq pisussaaffilerneqartussaanngilaq.

Ussersuutit atorlugit oqaluttaasartut allattorsimaffiat

Ussersuutit atorlugit oqaluttaasartut najuulluni onlinekkulluunniit oqaluttaanermik neqerooruteqartartut allattorsimaffiat ataani takusinnaavat.

Oqaluttaasartoq toqqaannaq attavigisariaqassavat paasissutissat tulliuttut pissarsiariniarlugit:

• akigititai

• piffissaatai 

• inniminniiffigineqartarnera

• akiliinissamut piumasaqaatai

• taamaatitsinermi malittarisassai

Eqqumaffigiuk: Ussersuutit atorlugit oqaluttaasartut ilai taamaatitsinissamut piffissamik  killissarititaqartarmata. Kingusinaarlutit taamaatitsissaguit, akiliisitsinissaq attatiinnarneqarsinnaammat.  

Allattorsimaffik

Maja Steffens Skærlund - Ussersuutit atorlugit oqaluttaanissamut misilitsissimasoq

Ussersuutit atorlugit oqaluttaaneq & Tegn Til Tale-mullu pikkorissaaneq aamma kalaallisut danskisullu ussersorsinnaaneq

Sumiiffik: Nuuk

Nuummi najuulluni oqalutseqarnissaq periarfissaasinnaavoq. Sumiiffinni allani onlinekkut oqalutseqarneq ingerlanneqartarpoq.

Attavissaq:

E-mali: majasteffens@gmail.com

Oqarasuaat: +299 29 13 37

Tilioq

Ussersuutit atorlugit oqaluttaasartunut Tilioq innersuussisinnaallunilu inniminniissussisinnaavoq.

Pisariaqartitsinermi Tilioq uunga allaffigalugu attavigineqarsinnaavoq.:

info@tilioq.gl

Taava ussersuutit atorlugit nutserisinnaasumut innersuussillunilu ataatsimiinnissamut linkimik  Tilioq nassiussisinnaavoq.

 Inatsit tunngaviusoq

Innuttaasutut allatuulli saaffiginninnermi oqalutseqarnissamut pisinnaatitaaffeqarputit, soorlu kalaallisuumiit danskisuumut aamma illuatungaanut nutserisoqartartoq.

Ussersuutit atorlugit oqalutseqarnermi, aningaasartuutit matussuserneqarnissaannut inatsit una tunngavigineqassaaq:

Inuit innarluutillit tapersersorneqarnissaannut Namminersorlutik Oqartussat nalunaarutaat nr. 29, 7 August 2020-meersumi, Kapitali 11 aningaasartuutaanerusunut tunngasoq.