Pissassarfimmi 2026-mi pikkorissaanerit kingullersaat kommuninit tamanit peqataaffigineqarpoq

Pikkorissarneq Qanigisatut tapersersortitullu ataatsimut inissisimaneq cand.psych. aamma ph.d. Cecilie Marie Schmidt Thøgersen suleqatigalugu ingerlanneqarpoq. Pikkorissarneq inuit innarluutilinnut qanigisaasut, peqatigisaanillu tapersersortitut  atorfeqartut eqqarsaatigalugit aaqqissuussaavoq. Tapersersortit assersuutigalugu tassaasinnaapput aappariit, angajoqqaat, qitornat imaluunniit qaratsakkut ajoqusersimasunut, tappiitsunut, autismeqartunut ADHD-qartunulluunniit qanigisaasut.

Qanigisatut tapersersortitullu ataatsimut inissisimaneq

Qanigisaaneq tapersersortitullu ataatsimut inissisimatilluni inissisimaffiit taakku marluk oqimaaqatigiissinniarnissaat ajornakusoorsinnaasarpoq. Inuk qanigisaq nammineq inuttut attaveqarfigalugu peqatigalugu, peqatigisaanik tapersersortitut  suliassat isumagineqartussaapput.

Pikkorissarnerup siunertaraa inissisimaffiit marluusut kingunerisinnaasaannik tarnikkut inooqatigiinnermilu unamminartunik sammisaqarneq, peqataasunullu ulluinnarni atorsinnaasaannik sakkussanik tunisinissaq.

Suliamut ilisimasalimmit saqqummiisoqarneratigut, sungiusarnikkut, eqimattakkaarluni suliaqarnerit ataasiakkaarlunilu eqqarsaatersornerit aqqutigalugit peqataasut makku sammisimavaat:

• Qanigisaasutut tapersersortitullu inissisimaffik: Inissisimaffiit marluusut paasillugit oqimaaqatigiissinniarnissaat

• Misigissutsikkut inooqatigiinnermilu allannguutit: Napparsimaneq innarluuteqarnerlu malitsigisaannik allannguutit suliarineqarnissaat

• Nammineq atugarissaarneq imminullu isumassorneq: Compassion-fokuseret tilgang aallaavigalugu nammineq atugarissaarnerup nukittorsarnissaa. Tassani imminut paasinnittumik isumassuineq, tassa self-compassion, immikkut sammineqarluni.

Pikkorissarnermi saqqummiinerit, eqimattakkaarluni sungiusarnerit ataasiakkaarlunilu eqqarsaatersornerit paarlakaajaallutik ingerlanneqarput. Peqataasut ulluinnarni atorsinnaasaminnik ilisimasanik sakkussanillu pissarsinissaat pingaartinneqarpoq.

Kommuninit tamanit peqataasuni ilisimasanik misilittakkanillu avitseqatigiinneq

Kommuninit tamanit peqataasoqarnera pissutigalugu pikkorissarneq aamma kommunit akimorlugit naapinnissamut, misilittakkanik avitseqatigiinnissamut imminnullu ilinniarfigeqatigiinnissamut periarfissiivoq.

Peqataasut peqataalluarnerannut misilittakkaminnillu avitseqatiginninnerannut Pissassarfimmit qujarusuppugut. Aamma Cecilie Marie Schmidt Thøgersen suleqatigilluarneranut pikkorissaanermilu ilisimasanik avitseqateqarnerminut qujavugut.

Pikkorissaanermik aaqqissuussinitsinni ukioq manna pikkorissaanitta kingullersaat taamaalillugu naammassivarput.