airplanebooksbriefcase business cogs cross election entertainment fish house law lockmedicalpeopleselfservices socialtax

Siunnersuineq 

Innarluutillit pillugit akeqanngitsumik Pissassarfik siunnersuisarpoq. Siunertaasoq tassaavoq illit, kommunimi sullissisut ilaquttatillu innarluutillit pillugit sulisumit piginnaasaqarluartumit siunnersorneqarnermik tunineqarnissaat.
Maili, oqarasuaat imaluunniit Pissassarfimmut ornigullutit siunnersortissinnaavutit. Tapersersortit inuillu suliaqartut allat aamma siunnersorneqarsinnaapput.

Innarluutilinnut tunngassutillit pillugit apeqqutissaqartut innuttaasut aamma inuit suliallit tamarmik saaffiginnissinnaapput.

Suleqatigiit ukuupput timimik sungiusaasut, pillorissaasut perorsaasullu. Innarluutilinnut tunngasut pillugit ukiuni arlalinneersunik misilittagaqarpugut Kalaallit Nunaannilu inuit innarluutillit periarfissaat pillugit ilisimasaqarluarluta.

Assersuutigalugu siunnersuisinnaavugut ilitsersuillutalu makku pillugit:

  • Uanga/meeqqama Pissassarfimmut pissassariarnissara/pissassariarnissaa naleqquppa?
  • Eqqarsartaatsikkut timikkullu innarluuteqarnermut sanilliullugu ulluinnarni unammilligassat qanoq qaangerneqartarpat?
    • Angerlarsimaffimmi
    • Najugaqarfinni
    • Ulluunerani paaqqinnittarfimmi
    • Atuarfimmi 
    • Suliffimmi 
    • Sunngiffimmi 
  • Uanga/meeqqama innarluutaanut tunngatillugu ikiorsiinermik suliniutit/atortut ikiorsiissutit suut pigineqarpat?
  • Kalaallit Nunaanni, Danmarkimi imaluunniit nunani allani sulialittut ilisimasalinnik allanik sumi peqarpa?

Malugiuk!
Pissassarfik ikiorsiissutinik imaluunniit atortorussaarutinik tunniussinissaq pillugu aalajangiisinnaanngilaq. Ikiorsiissutinut aamma atortorissaarutinut aningaasaliinissaq pillugu aalajangiisussaq tassaavoq najugaqarfigisanni kommuni.

Siunnersuinerit nalinginnaasumik ilisimatitsinerupput. Tassunga atatillugu siunnersuineq Pissassarfimmi sulisumik sulianut naleqquttumik naatsumik oqaloqatigiinneruvoq.

Siunnersuinermik annerusumik atorfissaqartitsisoqarpat, tamanna pissassarnertut nalilerneqarsinnaavoq, tamannalu taamaallaat Pissassarfimmut innersuunneqarnikkut anguneqarsinnaalluni. Pissassarfimmut innersuunneqarneq illit kommunimi sullissisut aqqutigalugu pissaaq.

Allaffigisigut uunga e-mail-imut: pissassarfik@nanoq.gl imaluunniit sianerit uunga oqarasuaat: 34 50 70-imut.

Nammineerluni takkulluni oqarasuaatikkullu saaffigineqarnissamut ammavugut: Ataasinngorneq – Tallimanngorneq nal. 09.00-15.00. 

Oqarasuaatikkut nammineerlunilu takkulluni saaffiginninnerni, attaveqarfigineqarnissannut paasissutissat ilinnut tunngasut pissavagut, kingornalu sulisumit ilisimasalimmit attaveqarfigineqassaatit.