Siunnersuineq innuttaasunut, qanigisaasunut aamma suliassamut immikkut ilinniarsimasunut
Siunnersuineq innuttaasunut, qanigisaasunut aamma suliassamut immikkut ilinniarsimasunut
Pissassarfik innarluuteqarnermut tunngasut pillugit Kalaallit Nunaat tamakkerlugu innuttaasunut sulisunullu suliassanut immikkut ilinniarsimasunut akeqanngitsumik siunnersuisarpoq. Siunertaavoq illit, qanigisatit, kommunimi sullissisorisat imaluunniit allat attuumassutillit suliassanut immikkut ilinniarsimasut innarluuteqarnermut tunngasunik apeqquteqarlusi saaffiginnissinnaanersi piukkunnaateqartumillu siunnersorneqarlusi.
Ungasianniit sullinneqarnikkut siunnersorneqarsinnaavutit, oqarasuaat, maili, imaluunniit videu aqqutigalugit. Imaluunniit ornigulluni takkunnermi.
Passussisoqatigiit immikkut ilisimasallit tamaani arlallit suleqatigiipput. Innarluutilinnut tunngasut pillugit ukiuni arlalinni misilittagaqarpugut, Kalaallit Nunaannilu inuit innarluutillit periarfissaat pillugit ilisimasaqarluarluta.
Assersuutigalugu makku pillugit siunnersuisinnaavugut ilitsersuisinnaallutalu:
- Uanga/meeqqama Pissassarfimmut pissassariarnissara/pissassariarnissaanut innersuunneqarnissamut naleqquppunga/naleqquppa?
- Eqqarsartaatsikkut timikkullu innarluuteqarneq pillugit ulluinnarni unammillernartitat qanoq iluatsissinnaappat?Angerlarsimaffimmi
Najugaqarfimmi
Ulluunerani paaqqinnittarfimmi
Atuarfimmi
Suliffimmi
Sunngiffimmi
Uanga/meeqqama innarluutaanut tunngatillugu ikiorsiiniutit /atortut ikiuutit suut pigineqarpat?
Kalaallit Nunaanni, Danmarkimi imaluunniit nunani allani sulialittut ilisimasalinnik allanik sumi peqarpa?
Malugiuk Pissassarfiup ikiorsiiniutit pillugit aalajangiisinnaananilu atortunik ikiuutinik tunniussisinnaanngilaq. Illit Kommunerisat aamma sullissisut taakkuupput aningaasaliissutinut aalajangiisussat.
Oqaloqatigiilluni siunnersuinerit nalinginnaasumik ilisimatitsinerupput. Tassunga atatillugu siunnersuineq sivikitsumik oqaloqatiginninnerussaaq Pissassarfimmi suliamut attuumassuteqartumik sulialimmik.
Sivikitsumik oqaloqatiginninnermiit annertunerusumik pisariaqartitsisoqartillugu tamanna pissassarnertut nalilerneqassaaq, tamannalu taamaallaat Pissassarfimmut innersuunneqarnikkut anguneqarsinnaavoq. Pissassarfimmut innersuunneqarneq illit kommunerisanni sullissisut aqqutigalugu pissaaq.
Linki tulliuttoq toorlugu Pissassarfimmi pissassarneq paasisaqarfiginerujuk:
Pissassarneq
Nammineerluni takkunnikkut aamma oqarasuaat aqqutigalugu saaffigineqarnissamut ammavugut:
ataasinngorneq – tallimanngorneq nal. 09.00-12.00 aamma 13:00-15:00 akornanni.
Oqarasuaat aqqutigalugu aamma nammineerluni takkunnikkut saaffiginninnermi, attaveqarfigineqarnissannut paasissutissaatitit ilinnut tunngasut piumassavagut, kingornalu sulisumit ilisimasalimmit attaveqarfigineqarumaarputit apeqqutigisannillu akissutissarsillutit.
E-mailimut uunga allaffigitigut: pissassarfik@nanoq.gl imaluunniit oqarasuaammut uunga sianerit : 34 50 70
Nappaatip/innarluutip suussusersinera
Nappaammut/innarluummut suussusiliiffigineqarsimaguit imaluunniit innarluuteqaleqqammersimaguit, aamma nappaatip/innarluutip suussusernera innarluutigisallu pillugit annertunerusumik ilisimasaqalernissat siunnersorneqarnissallu pisariartikkukkit Pissassarfik attavigisinnaavat.
Pisinnaatitaaffiit
FN-ip Naalagaaffiit Peqatigiit innarluutillit pillugit isumaqatigiissutaat naapertorlugu innuttaasutut ima pisinnaatitaaffeqarputit:
Isumaqatigiissutip matuma siunertaraa inuit innarluutillit tamarmik, inuit allat atugassarisaat assigalugit, inuit pisinnaatitaaffiinik aamma tunngaviusumik kiffaanngissuseqarnissamut pisinnaatitaaffiinik iluaquteqarnissamut periarfissaasa siuarsarnissaat, illersornissaat qularnaarnissaallu, kiisalu pissusissamisuuginnartumik ataqqinassuseqarnerisa ataqqineqarnerata siuarsarnissaa. Inunnut innarluutilinnut ilaapput inuit timikkut, tarnikkut, silappaarissutsikkut imaluunniit malugissutsimikkut sivisuumik piginnaasakillisimasut, akimmiffissallu allat peqatigalugit inuiaat allat assigalugit inuiaqatigiit inuunerannut tamakkiisumik peqataanissaannut akornusiisinnaasut.
Uannga: Naalagaaffiit Peqatigiit innarluutillit pillugit isumaqatigiissutaanni artikel 1:
Pisinnaatitaaffitit pillugit aamma qulaani allassimasut ilinnut qanoq isumaqarnerinik annertunerusumik siunnersortikkumaguit Tilioq innersuussutigivarput, illit aamma qanigisavit pisinnaatitaaffisi pillugit siunnersuillutillu ilitsersuisinnaammata.
Linkimi tulliuttumi Tilioq pillugu sukumiinerusumik ilisimasaqarnerulerit aamma attaveqarnermut paasissutissat nassaarikkit:
Tilioq | Saqqaa
Atortut ikiuutit/sakkussat
Atortorissaarummik ikiuummik pissarsiniarlutit pisinnaatitaaffitit nalornissutigigukkit, atortorissaarut ikiuut innarluuteqarnerpit malitsigisaanut ikiuutaasinnaanersoq, imaluunniit atortorissaarut ikiuut sorleq ulluinnarisanni oqilisaataasinnaanersoq paasiniarukku siunnersortikkumallutit Pissassarfik attavigisinnaavat.
Innarluutit pissutigalugu ulluinnarisavit ilusilersornissaa ajornakusoortikkukku aamma ulluinnarisat nukissaqarfiginngikkukku, eqqaamanninniarnerit ajornakusoortikkukku (assersuutigalugu isumaqatigiissutini imaluunniit pisiniarnermi), immaqaluunniit ullup ingerlanerani aamma sapaatip akunnerani nukissaqassutsit aallaavigalugu sammisassat ataqatigiissarnissai ajornakusoortikkukkit, Pissassarfiup sakkussat pillugit siunnersorsinnaavaatit ulluinnarisanni iluaqutigisinnaasannik.
Pissassarfiup ulluinnarni unammillernartitatit pillugit ilinnooqqissaaq tulluuttumik siunnersorlutillu paasissutississinnaavaatit.
Qulaani allassimasut pineqartut assersuutaannaapput – ulluinnarni allanik unammillernartitaqaruit imaluunniit atortorissaarutit ikiuutit aamma sakkussat pillugit allanik apeqqutissaqaruit Pissassarfiup attaviginissaanut tikilluaqqusaavutit, tassani ikiorumallutit siunnersorneqassaatit pitsaanerpaamillu siunnerfilerumallutit aqqutissiuunneqassaatit.
Malugiuk Pissassarfik ikiorsiiniutit pillugit aalajangiisinnaananilu atortunik ikiuutinik tunniussaqarsinnaanngilaq. Illit kommunerisat aamma sullissisut taakkuupput aningaasaliissutinut aalajangiisussat.
Sulineq – Nikerartumik sulineq
Siunissami sulinermut tunngatillugu qanoq pisoqarnissaanik eqqarsaatersuuteqartarpit? Sulileqqissinnaanera piviusorsiorpa? Ullut tamaasa nalunaaquttap akunneri arfineq pingasut sulisinnaavunga? Qanoq iliorlunga aallarteqqissaanga? Tamakkuninnga eqqarsaatersuuteqarpit imaluunniit sulileqqinnissaq pillugu assingusumik eqqarsaatersuuteqaruit siunissami periarfissatit pillugit Pissassarfiup siunnersorsinnaavaatit. Tamakkiisumik suleqqilernissaq imaluunniit siusinaartumik soraarnerussutisiaqalernissaq kisimik periarfissaanngillat, aamma taakku akornanni allanik periarfissaqarpoq, soorlu nikerartumik sulineq.
Qulaajaaniarluni ingerlatsineq, nikerartumik suliffeqarneq aamma aningaasarsianut tapiissutit pillugit inatsisitigut aalajangersakkat linkimi tulliuttumi atuarsinnaavatit:
Piginnaanngorsaaqqinnissamut ikiorsiiniarneq pillugu Inatsisartut peqqussutaata allanngortinneqarneranik Inatsisartut inatsisaat
Malugiuk Pissassarfik siunissami suliffeqarnissat pillugu aalajangiisinnaanngilaq. Nikerartumik sulineq pillugu immikkuullarinnersumik siunnersortikkumalluni Majoriaq innersuussutigivarput.
Linkimi tulliuttumi Majoriap attaveqarnermut paasissutissaatai nassaarisinnaavatit:
Majoriaqarfinnut attavissat
Nunaqarfimmi najugaqaruit Sullissivik attavigisinnaavat.
Angajoqqaat
Meeqqamut innarluutilimmut, suussusilerneqarsimasumik nappaatilimmut imaluunniit innarluutilimmut, immikkulluunniit pisariaqartitsisumut angajoqqaajuit? Meeqqavit suussusilikkamik nappaataa/innarluutaa pillugu ilisimasanik amigaateqaruit, siunissaq nalorninartoqartikkukku, meeqqavit paasinissaa ajornakusoortittarukku qanorlu pitsaanerpaamik ikiorsernissaa nalornissutigisarukku aamma/imaluunniit meeqqavit attaveqarfiginerani unammillernartitaqaruit taava Pissassarfiup siunnersorsinnaavaatit.
Assersuutigalugu makkununnga tunngatillugu siunnersorsinnaavatsigit:
o Meeqqavit suussusilikkamik nappaataa/innarluutaa
o Siunissaq periarfissallu
o Atortorissaarutit ikiuutit/sakkussat
o Tapersersuineq
o Angerlarsimaffimmi avatangiiserisat
o Atuarfik
o Inooqatigiittut susassareqatigiinneq
o Pissusilersuutit
Qulaaniittut assersuutaannaapput – ulluinnarni allanik unammillernartitaqaruit imaluunniit meeqqavit suussusilikkamik nappaataa, innarluutaa pillugu allanik apeqqutissaqaruit, Pissassarfik attavigisinnaavat, tassani siunnersorneqassaatit pitsaanerpaamillu siunnerfilerumallutit aqqutissiuunneqassaatit.
Qatanngutit
Innarluutilimmik, suussusilikkamik nappaatilimmik/innarluutilimmik imaluunniit immikkut pisariaqartitsisumik qatannguteqarpit, aamma pissusilersortarnera iliuuseqartarneralu paasiuminaatsittarpigit? Pissassarfiup siunnersorsinnaavaatit aamma qatanngutivit innarluutaa, suussusilikkamik nappaataa/innarluutaa pillugit paasissutissillutit, sunalu pissutigalugu aalajangersimasumik pissusilersortarnersoq imaluunniit iliuuseqartarnersoq annertunerusumik paasissutississinnaallutit, qatanngutit paasilluarnerusinnaaleqqullugu. Aammattaaq qatanngutivit qanoq pitsaanerpaamik attavigisinnaanera pissuseqarfigisinnaaneralu pillugit siunnersorsinnaavatsigit.
Aapparisaq/inooqatigisaq
Inummut suussusilikkamik nappaatilimmut/innarluutilimmut imaluunniit qanittukkut innarluuteqalersumut aappaavit/inooqataavit, suussusiliiffigineqarsimanera imaluunniit innarluutaa pillugu annertunerusumik paasisaqarnissamik pisariaqartitsivit? Taava ilisimasaqarnerulerumallutit imaluunniit siunnersortikkumallutit Pissassarfik attavigisinnaavat. Assersuutigalugu aapparpit/inooqativit qanoq pisimanera pillugu annertunerusumik paasisaqarnissannik ikiorsinnaavatsigit, aapparpillu/inooqativit paasinerunissaanik ikiorsinnaallutit.
Aapparpit/inooqativit atortorissaarummik ikiuummik pissarsiniarnermi pisinnaatitaaffii nalornissutigigukkit, atortorissaarut ikiuut aapparpit/inooqativit innarluuteqarnerata malitsigisaanut ikiuutaasinnaanersoq imaluunniit atortorissaarut ikiuut sorleq ulluinnarisaani ulluinnarisassinnilu oqilisaataasinnaanersoq paasiniarukku siunnersortikkumallutit Pissassarfik attavigisinnaavat. Pissassarfiup ulluinnarni unammillernartitarisinnaasasi pillugit ilissinnut tulluuttumik siunnersorlutillu paasissutississinnaavaatit.
Malugiuk Pissassarfik ikiorsiissutit pillugit aalajangiisinnaananilu atortorissaarutinik ikiuutinik tunniussaqarsinnaanngilaq. Kommunerisarsi aamma aapparisavit/ inooqativit sullissisua tassaapput aningaasaliinermut aalajangiisussat.
Assersuutigalugu makkununnga tunngatillugu siunnersorsinnaavatsigit:
o Aapparpit/inooqativit suussusilikkamik nappaataa/innarluutaa
o Pissusilersorneq
o Attaveqaqatigiinneq
o Siunissaq periarfissallu
o Atortorissaarutit ikiuutit/sakkussat
o Tapersersuineq
o Angerlarsimaffimmi avatangiiserisat
Pingaarutilik Ilinnut appaasutut/inooqataasutut siunnersuutigissavarput tamatigut imminut eqqaamasassagavit aamma nammineq pisariaqartitatit isumagissagakkit. Ulluinnarisassinni annertuumik allanngortoqarsimappat, suut tamarmik inornartutut ippata aamma siunissaq nalorninartoqartikkukku Pissassarfik attavigisinnaavat siunnersorneqarumallutit.
Meeraq/ kinguaajusoq inummut innarluutilimmut
Suussusilikkamik nappaatilimmik/innarluutilimmik imaluunniit immikkut pisariaqartitsisumik angajoqqaaqarpit, angajoqqaappit suussusilikkamik nappaataa/innarluutaa pillugu paasissutissanik amigaateqarpit, siunissarlu nalorninartorsiutigiviuk aamma/imaluunniit angajoqqaat paasiuminaatsittarpiuk, taamaappat Pissassarfiup siunnersorsinnaavaatit. Angajoqqaappit innarluutaa,suussusilikkamik nappaataa/innarluutaa pillugit paasissutissinnerusinnaavatsigit tassuunakkullu angajoqqaavit paasilluarnerunissaanut ikiorserlutit.
Assersuutigalugu makkununnga tunngatillugu siunnersorsinnaavatsigit:
o Suussusilikkamik nappaat /innarluut pillugu ilisimasat
o Pissusilersorneq
o Attaveqaqatigiinneq
o Siunissaq periarfissallu
o Atortorissaarutit ikiuutit/sakkussat
o Tapersersuineq
o Angerlarsimaffimmi avatangiiserisat
Qulaaniittut assersuutaannaapput – ulluinnarni unammillernartitanik allanik misigisaqartaruit imaluunniit angajoqqaappit suussusilikkamik nappataanut /innarluutaanut tunngasumik apeqqutissaqaruit, Pissassarfik attavigisinnaavat, tassani siunnersorneqassaatit pitsaanerpaamillu siunnerfilerumallutit aqqutissiuunneqassaatit.
Ilaquttat
Pissassarfik ilaqutariinnut siunnersuisarpoq. Ilaqutariittut ulluinnarisassi nalinginnaasumik ingerlannissaa unammillernartoqartikkussiuk, ilaqutaqarlusi innarluutilimmik, suussusilikkamik nappaatilimmik/innarluutilimmik imaluunniit immikkut pisariaqartitsisumik siunnersorsinnaavatsigit pitsaanerpaamik ulluinnarisasi qanoq ingerlassinnaanerisi ilaqutariittut. Assersuutigalugu siunnersuisinnaavugut angerlarsimaffissinni avatangiiseq pillugu, aamma sakkussanik tunisinnaavatsigit ulluinnarni unammillernartitat iliuuseqarfiginiarlugit.
Suliassanut immikkut ilinniarsimasut ataani allassimasut assersuutaannaapput. Allatut suliaqartuuguit, pisariaqartillugulu innuttaasumut innarluutilimmut, suussusilikkamik nappaatilimmut/innarluutilimmut immaqaluunniit immikkut pisariaqartitsisumut tunngatillugu suliatigut isummersoqateqarnissaq, imaluunniit siunnersorneqarnissaq, tikilluaqqusaavutit aamma attaviginissatsinnut.
Ilinniartitsisoq/atuarfik
Atuarfimminngaanneerpit soorlu ilinniartitsisoq, atuartuuteqarpit immikkut pisariaqartitsisumik/-nik innarluuteqarneq imaluunniit suussusilikkamik nappaateqarneq/innarluuteqarneq tunngavigalugu ullup atuarfiusup ingerlanerani unamminartitalimmik/-nnik, taava siunnersorsinnaavatsigit. Siunnersorsinnaavatsigit qanoq tapertaasinnaanersutit aamma ikiuussinnaanersutit atuartup innarluutillip suussusilikkamik nappaatillip/innarluutillip imaluunniit immikkut pisariaqartitsisup ulluinnarisaa minnerpaamik unammillernartoqartinniarlugu.
Assersuutigalugu makku pillugit siunnersorsinnaavatsigit:
o Suussusilikkamik nappaat/innarluut pillugu ilisimasat
o Assersuutigalugu ini atuartitsiviusup pisatsersornera
o Atortorissaarutit ikiuutit/sakkussat
o Atuartitsinermi ikiuineq
o Suliamut tunngasumik siunersiueqatigiinneq
Qulaaniittut assersuutaannaapput, allanut tunngatillugu apeqqutissaqaruit Pissassarfik attavigisinnaavat, tassanngaanniit pitsaanerpaamik siunnerfilerumallutit aqqutissiuullutillu siunnersorneqassaatit.
Perorsaasoq/suliffeqarfik
Perorsaasuuguit imaluunniit suliffeqarfimmi allatut suliassamut immikkut ilinniarsimasutut suliaqartuullutit, meeqqamillu innarluutilimmik immikkulluunniit pisariaqartitsisumik aamma unammillernartitaqartumik paarsaqarlutit, taava siunnersorsinnaavatsigit. Meeqqap ulluinnarni unamminartitaasa annikinnerpaaffianiitinnissaannut qanoq tapertaallutillu ikiuussinnaaninnut siunnersorsinnaavatsigit.
Assersuutigalugu makkununnga tunngatillugu siunnersorsinnaavatsigit:
o Suussusilikkamik nappaateqarneq/innarluuteqarneq pillugit ilisimasat
o Pissusilersorneq
o Attaveqaqatigiinneq
o Avatangiiserisat
o Atortorissaarutit ikiuutit/sakkussat
o Suliamut tunngasumik siunersiueqatigiinneq
Qulaaniittut assersuutaannaapput, allanut tunngatillugu apeqqutissaqaruit Pissassarfik attavigisinnaavat, tassanngaanniit pitsaanerpaamik siunnerfilerumallutit aqqutissiuullutillu siunnersorneqassaatit.
Sullissisoq (sagsbehandler)/kommuni
Kommunimeersuuguit assersuutigalugu sullissisuullutit (sagsbehandleri) pisariaqartillugulu innuttaasup innarluutillip naapinnissaanut tunngatillugu siunnersorneqarnissat, taava siunnersorsinnaavatsigit.
Assersuutigalugu makkununnga tunngatillugu siunnersorsinnaavatsigit:
o Suussusilikkamik nappaateqarneq/innarluuteqarneq pillugit ilisimasat
o Atortorissaarutit ikiuutit/sakkussat
o Suliamut tunngasumik siunersiueqatigiinneq
Qulaaniittut assersuutaannaapput, allanut tunngatillugu apeqqutissaqaruit Pissassarfik attavigisinnaavat, tassanngaanniit pitsaanerpaamik siunnerfilerumallutit aqqutissiuullutillu siunnersorneqassaatit.
Aammattaaq siunnersuutigissavarput kommunip passussisui (terapeuter) periarfissaappata atoqqullugit. Assersuutigalugu atortorissaarutit ikiuutit pillugit nalilersuinermi imaluunniit naleqqussaanermi aamma suliatigut nalilersuinermi, periarfissaqarsinnaammatalu innuttaasup misissornissaanut.
Immikkut suliassani pisariusuni kommunalbestyrelsip Pissassarfik qinnuigisinnaavaa qulaajaanermik naammassinneqqullugu Inatsisartut inatsisaanni § 25, imm. 8 tunngavigalugu:
Linki tulliuttoq toorlugu inatsit iserfigiuk:
Inuit innarluutillit tapersersorneqarnissaannut Inatsisartut inatsisaat
Suliffissarsiuussineq, ilinniarnermut aamma sulinermut tunngatillugu ilitsersuinermi, aamma sulinermi ilinniarnermilu piginnaanngorsaqqiineq pillugit, ullormusiat ilanngullugit suliaqartoqartillugu imaluunniit siunnersorneqarnissamik pisariaqartitsinermi Majoriaq innersuupparput.
Siunnersuineq ilaatigut siunissami suliffeqarnissamut tunngasinnaavoq tamatuma ataani nikerartumik sulineq aamma piginnaanngorsaqqinneq.
Linkini tulliuttuni Majoriaq pillugu paasissutissat annertunerusut nassaarisinnaavatit:
Majoriaq
Linkimi tulliuttumi Majoriap attaviginissaanut paasissutissat nassaarisinnaavatit:
Majoriaqarfinnut attavissat
Sulisitsisoq
Sulisitsisuuit suleqatitaarsimallutillu immikkut pisariaqartitsisumik, innarluutilimmik unammillernartitallu pillugit paasisaqarnerujumallutit, qanorlu pitsaanerpaamik ikiuussinnaajumallutit Pissassarfik siunnersortikkumallutit attavigisinnaavat.
Assersuutigalugu makkununnga tunngatillugu siunnersorsinnaavatsigit:
o Suussusilikkamik nappaateqarneq/innarluuteqarneq pillugit ilisimasat
o Pisatsersuineq & avatangiiserisat
o Atortorissaarutit ikiuutit
Tamatuma saniatigut Tiliup nittartagaanut innersuussivugut, tassani nassaarineqarsinnaammata saqqummersitat ilinnut sulisitsisutut iluaqutaasinnaasut. Assersuutigalugu tamaani nassaarineqarsinnaapput innarluutit pillugit aamma suliffeqarneq pillugit najoqqutassiat, tassanilu illit sulisitsisutut innarluutit assigiinngitsut, nappaatit, aamma suussusilikkamik nappaatit/innarluutillu taakkualu suliffeqarniarnermut isumai atuarsinnaavatit – naatsunik nalinginnaasumillu allaaserisani.
Suliffissaqartitsiniarneq pillugu najoqqutassiat allallu iluaqutaasinnaasut Tiliup nittartagaani nassaarisinnaavatit, nittartakkami ’Ilisimasaqarfiup’ ataani tassanilu ’Tiliup saqqummersitai’ iserfigalugit imaluunniit linkimi tulliuttumi:
Tilioq | Tiliup saqqummersitai suliallu
Piginnaanngorsaaqqinneq pillugu paasisaqarnerujumalluni Sullissiviup nittartagaa innersuupparput.
Linkimi tulliuttumi piginnaanngorsaaqqinneq pillugu atuarsinnaavutit:
Piginnaanngorsaqqinneq (sullissivik.gl)
Nikerartumik sulisumik imaluunniit piginnaanngorsaqqittumik suleqateqalernissat kissaatigigukku Majoriap attaviginissaa innersuussutigivarput.
Linkimi tulliuttumi Majoriap attaviginissaanut paasissutissat nassaarisinnaavatit:
Majoriaqarfinnut attavissat
Tapersersorti
Tapersersortaavit innutaasumut innarluutilimmut, suussusilikkamik nappaatilimmik/innarluutilimmik imaluunniit immikkut pisariaqartitsisumut. Ilisimasassallu amigaatigalugit innarluutip, suussusilikkamik innarluutip/nappaatip suussusai, pisariaqartitaani aamma qanoq sullitavit ulluinnarisaani ingerlalluarnissaanut tapersersornissaanut, taava Pissassarfiup siunnersorsinnaavaatit.
Assersuutigalugu makkununnga tunngatillugu siunnersorsinnaavatsigit:
o Innuttaasup sullitavit suussusilikkamik nappaataa/innarluutaa
o Pissusilersorneq
o Attaveqaqatigiinneq
o Atortorissaarutit ikiuutit/sakkussat
o Suliamut tunngatillugu siunersiueqatigiinneq
o Qanoq ilillutit innuttaasoq sullitat pitsaanerpaamik tapersersorsinnaanerit aamma tapersersussagit
Qulaanittut assersuutaannaapput – ulluinnarni allanik unammillernartitanik misigisaqartaruit imaluunniit innuttaasup sullitavit suussusilikkamik nappaataa/innarluutaa pillugu allanik apeqqutissaqaruit, Pissassarfik attavigisinnaavat, tassanngaanniit pitsaanerpaamik siunnerfilerumallutit aqqutissiuullutillu siunnersorneqassaatit.