"Pissassarfiup ammarneqarneranit ukiut arfineq marluk qaangiunneranni, maanna Pissassarfimmi tunngaviusumik nuna tamakkerlugu inunnut innarluutilinnut sullissinitsinni alloriarnissamut tulliuttumut piareersimavugut.

Periusissiatsinni nutaami siunertaralugulu anguniarparput, nunatsinni innuttaasut, sullitatta kommunit aamma suliassaqarfiit allat innarluutillit pillugit suliaqarfiusut, Pissassarfiup neqeroorutaanik ilisimaarinninnerulernissaat qanorlu atorneqarsinnaanerinik ilisimasaqarlualernissaat. Tamannalu pitsaanerusumik attaveqaqatigiinnitsigut qanimullu suleqatigiilluarnitsigut angorusupparput"

Naja O. Lennert
​Pissassarfimmi pisortaq

Anguniagassatut takorluukkat

Pissassarfiup siunertaraa innuttaasut innarluutillit aamma innarluutilinnut qanigisaasut, inuunermi killiffimminni atugarissaarnerisa isumaqarluartumillu ulluinnarisaminni inuuneqarnissamut periarfissaasa pitsanngorsarnissaat.

Taamatullu Pissassarfiup siunertarivaa Kalaallit Nunaanni innuttaasut, aamma innarluutillit pillugit suliaqarfinni suliallit pisariaqartitaat naapertorlugit pitsaanerpaamik siunnersorlugillu ilitsersornissaat.

Anguniagaq

Kalaallit Nunaanni innuttaasut aamma innarluutillit pillugit suliaqarfinni sulisut, Pissassarfiup sullissinermi neqeroorutaanik ilisimasaqarlualernissaat.

Pissassarfiup periusissiaa aamma periusissiamut pilersaarut pdf-itut aajuk:

Periusissiaq & periusissiatut pilersaarut 2025-2028