airplanebooksbriefcase business cogs cross election entertainment fish house law lockmedicalpeopleselfservices socialtax

Sisimiuni pissassarneq 

Pissassarfimmi Sisimiuniittumi pissassarneq ingerlanneqartarpoq nalinginnaasumillu sapaatit akunnerinik marlunnik sivisussuseqartarluni.

Pissassarfiup inaataani innarluutilinnut naleqqussakkani nutaaliaasunilu najugaqassaatit.

Sisimiuni najugaqaruit, illit angerlarsimaffinni najugaqaannarlutit, nalinginnaasumik sapaatit akunnerini qulini pissassarneq ingerlanneqartarpoq, sapaatip akunneranut marloriarluni-pingasoriarluni Pissassarfimmi sungiusarnermik ilaqartinneqartumik.

Pissassarneq pilersaarusiugaavoq ilinnullu naleqqussagaalluni. Tassani illit maannakkullu unammilligassatit aallaaviussarput. 
Pissassarnermut piumassuseqarlutit aggertarnissat ulluinnarnilu unammilligassat suliarinissaat pingaaruteqarpoq.

Pissassarfimmi sulianut ilisimasalinnik suliaqartunik peqarpoq:

  • Timimik sungiusaasut
  • Pillorissaasut
  • Perorsaasut

Tamatumuuna suliat akimorlugit ataatsimoortumillu isiginneriaaseqarluni pilersaarusiornissamut immikkuullarissumik periarfissiivoq, tamatumani inuttut tamakkerlutit ulluinnarisannilu unammilligassat naammattoortakkatit isiginiarneqassallutik. Sungiusarneq ilinniartinneqarnerlu ataasinngornermiit tallimanngorneq ilanngullugu nal. 8.00-ip aamma 16.00-ip akornanni ingerlanneqartarpoq.

Pissassarneq ukuninnga imaqarsinnaavoq, assersuutigalugu:

  • Atukkannik qulaajaaneq
  • Periarfissannik erseqqissaaneq
  • Ilitsersuineq
  • Ilinniartitsineq
  • Sungiusarneq
  • Malitseqartitsineq

Ilinniartitsinerup, sungiusarnerup pissassarnerullu imarisaa assersuutigalugu tassaasinnaavoq:

  • Timikkut sungiusarneq
  • Najugaqarnermut sungiusarneq
  • Atortunik ikiorsiissutinik atuinissamut sungiusarneq
  • Oqalunnermut oqaatsitigullu piginnaasanik atuisinnaanermut ilinniartitsineq
  • Oqaloqateqarnerit
  • Atassuteqarfiit attaveqarfigisartakkallu

Assersuutit qulaani allassimasut aallaaviusussatut isigineqassapput.

Assersuutigalugu taqqakkut milittoornerup kingorna pitsorluttunngorsimaguit oqalunniarnikkullu ajornartorsiuteqalersimaguit, pitsorluttunngorsimanivit oqalunniarnikkullu ajornartorsiuteqalersimanivit ikiorsiiffiginissaat taamaallaat matumani pineqartussaanngilaq. Matumani pineqartussaq aamma tassaavoq, innarluuteqarnerup kingunerisaanik ajornartorsiutit ersarinnginnerusut isumaginiarnissaat. Matumani assersuutigalugu tassaasinnaappat inuunermi atugassarisat allanngornerat pissutigalugu eqqarsartaatsikkut imaluunniit sulisinnaassutsikkut unammilligassaasinnaasut.

Sungiusarnermi Pissassarfiup sungiusarluni atortorissaarutit aamma maluginiarnermut atortuutaanik atuinissamut periarfissaqarputit.

Pissassarnermut atatillugu ilaquttavit qanimullu attaveqarfigisartakkavit ilaatinnissaat eqqarsaatigineqartarput. Taamaammat pissassarnerup ingerlannissaani ilaquttannik imaluunniit tapersersortinnik ilagisaqassaatit.

Pissassarnerup imarisaanut ilaquttatit imaluunniit tapersersortit aallussisumik peqataassapput, taamaalillutik sakkussanik aalajangersimasunik pissarsissapput periutsinillu ilinniagaqarlutik, taama iliornikkut illit angerlareeruit ulluinnarisanni ilinnut tapersersuinissamut pitsaanerpaamik periarfissaqalissallutik.

Pissassarnivit ingerlanerani malitseqartitsinissamut pilersaarummik suliaqartoqassaaq. Amerlanertigut sungiusarnermut pilersaarummik tunineqassaatit, angerlaruit sungiusarnivit nanginnerani atugassannik.

Pissassartitsisarnerput pillugu paasisaqarnerorusukkuit attaveqarfiginissatsinnut tikilluaqqusaavutit uunga oqarasuaammut: 34 50 70 imaluunniit e-mail-imut: pissassarfik@nanoq.gl