Qinnuteqarneq
Sullissivik.gl aqqutigalugu imaluunniit kommunimi Sullissivimmi immersugassamik immersuillutit pissassariarnissamut qinnuteqarsinnaavutit.

Linki tulliuttoq toorlugu pissassariarnissamut sullissivik.gl aqqutigalugu qinnuteqarit:
Pissassarfimmut pissassariarnissamik innersuunneqarnissannut qinnuteqarit.

Innersuussineq
Kommunip qinnuteqaatit tiguguniuk, kommunimi sullissisut pissassariarnissamut piukkunnaateqarnersutit nalilersussavaat. Pissassariarnissamullu innersuunneqaruit sullissisunnit aggersarneqassaatit, tassani innersuussinermi immersugassaq aamma avitseqatigiissinnaanermut akuersilluni atsiugassaq iliuusissatullu pilersaarusiaq atsiortussaassavatit. Taakku kommunimi sullissisup Pissassarfimmut innersuussilluni ataatsimut nassiutissavai.

Pissassariarnissaq ilinnut naleqquttuunersoq Pissassarfimmit nalilersorneqassaaq.

Pissassariarnissamut akuerisaaneq
Pissassariarnissamut innersuunneqaruit, illit kommunimilu sullissisut Pissassarfimmit attavigineqassaasi, illit peqatigalutit isumaqatigiinnikkut pissassariarnissannut piffissaliisoqassaaq. 

Pissassarneq ilinnut akeqanngilaq.

Bilitsit, angalanermi allat aningaasartuutit, Pissassarfimmi nerisaqarneq aamma ineqarneq Pissassarfiup isumagissavai.

Allaanerusumik iliuuseqarnissaq ilinnut naleqqunneruppat, isumaqatigiissutigisassat allat pillugit illit kommunimilu sullissisut attavigineqassaasi.

Annertunerusumik paasisaqarusukkuit, attaveqarfiginissatsinnut tikilluaqqusaavutit uunga oqarasuaammut: 34 50 70 imaluunniit e-mailimut: pissassarfik@nanoq.gl

Pissutsit atugarisatit allannguuteqarpata
Qinnuteqaatip nassiunneqarnerata kingorna pissutsit atukkatit allannguuteqassappata – assersuutigalugu nuunnermi napparsimaleruilluunniit – erngertumik kommunimi sullissisut tamatuminnga ilisimatissavat. Taamattaaq Pissassarfik ilisimatissavat uunga  e-mailimut pissassarfik@nanoq.gll imaluunniit oqarasuaammut 34 50 70-imut 

Pissassariarluni angalanermi aningaasartuutit pillugit ilisimatitsissut:
Ukioq 2023 aallarnerfigalugu innuttaasup Pissassarfimmi piginnaanngorsaqqinnissaanut atatillugu kommune innersuussisoq angalanermi aningaasartuutinut akisussaasunngortinneqarnerat maanna Inatsisartut Aningaasaqarnermut Akileraartarnermullu Ataatsimiititaliaat ullormi 31. Maaji 2024-imi aalajangiussaqarpoq 2024 ukiup sinneranut aningaasaliissutit amerlineqassasut. Aningaasaliissutit ilassutaasut innuttaasut innarluutillit piginnaanngorsaqqinnissaannut Pissassarfimmut ingiallortaatalu angalanissaannut atorneqassapput. Taamaasilluni Kommunit toqqaannartumik Pissassariarnermi angalanermut 2024 naanissaata tungaanut aningaasartuuteqassanngillat.

Saniatigut kommunit aaqqissuussaanerata assigiimmik pisussaaffeqartitsisup, ataatsimoortumik tapiissutini piffissami 2018-2020 kommuninut isumaqatigiissutaasimasut malillugit, 2025 aallarnerfigalugu pilerseqqinneqarnissaa anguniarlugu isumaqatigiinniarnermut ilanngunneqassaaq. 

Kommunit pissassariartitsinermut ukiup sinneranut angalanermut aningaasartuuteqarunnaarneranni neriuutigivarput innersuussineq ingerlalluaqqilissasoq, innersuunneqartussat pillugit kommunit suleqatigilluarnissaat qilanaarivarput.