Nuna tamakkerlugu Pissassarfimmi innarluutilinnik naapeqatigiissitsineq. Isigiarsuttunut tappiitsunullu neqeroorut

Peqataajumalluni qinnuteqarneq online aqqutigalugu ingerlanneqassaaq.

Malungiuk: Tapersersortimik peqataasoqassappat, immersugassap immersunnginnerani tapersersortaasup pisortarisaa qaninneq paasitinneqareersimassaaq peqataatitsinissamullu akuersisimassalluni.

SAP. AK. 28 INGERLANERANI MAANA ONLINEKKUT PEQATAANISSAMUT QINNUTEQARSINNAALISSAATIT

Nassuiaat:
Isigiarsuttuuneq tappiitsuunerlu inuunermut qanoq sunniuteqarsinnaasarpat? Oqimaaqatigiissumik inuuneq nukissaqarnarnerusorlu anguniaraanni unamminartut qanoq iliuuseqarfigineqarsinnaappat?

Uani naapeqatigiissitsinermi misilittakkatit tunngavigalugit avitseqateqarnissannut periarfissaqar-putit, tarnikkut kingunerluutit paasisaqarfigalugit, inuunivillu naleqassusaata pitsaassusaatalu nukittorsaarnissaannut sakkussanik pissarsiaqarlutit.
Inoqatigut inuunermi atugarisat assinginik atugaqartut peqatigigaangatsigit, tarrarsorfigeqatigiis-sinnaasarpugut, paasineqarluarnerusutut misigaluta kiserliortutullu misigineq annikillisarluni.

Inuunermi unamminartitaqarluni tusaaneqarneq ataqqineqarnerlu pingaaruteqarput, inuunerlu ineriartorfiujuarmat sakkussanik nutaanik pissarsinissaq alloriaqqinnissamut pingaaruteqarpoq.
Akuersiniarneq ajornakusoornarsinnaavoq, inuunerli siumut ingerlariaqqissappat allannguutit ajugaaffigineqartariaqarput.

Tarnip pissusiinik ilisimasalimmik tunuliaqutaqartumik saqqummiisoqassaaq, isigiarsuttutut tappiitsutullu inuuneq akuersaarnarnerusoq ukkatarineqassalluni, ulluinnarnilu sakkussat naleqqunnerusut saqqummiunneqassallutik.

Aqqutinni sumulluunniit killikkaluaruit, ataatsimooqatigiinnermut peqataanissannut tikilluaqqusaavutit.

Tarnip pissusiinik immikkut ilisimasalik autorisationilik Aviaq Kleist Sethsen suleqatigalugu naapeqatigiissitsineq kalaallisut ingerlanneqarumaarpoq.

Ingiallorteqarsinnaatitaanermut pisinnaatitaaffik
Innuttaasut sakkortuumik isigiarsuttut tappiitsullu angalanermi ingiallorteqartussaatitaapput. Ingiallorteqarnissamik pisariaqartitsiguit, naapeqatigiissitsinissamut peqataanissamik qinnuteqarlutit immersuininni Dansk Blind samfund qullersaqarfianiit imaluunniit Isumaginninnermut Aqutsisoqarfiup qullersaqarfianiit uppernarsaat`inersimasumik isiginiarnermigut ajornartorsiuteqanngitsumit ingiallorteqarsinnaatitaanermut uppernarsaat`ilanngullugu kakkiutissavat.

Uppernarsaatip ilanngunneqarnissaanut pissutaavoq peqataasussap ingiallortaasussallu angalanermi billetsissai ataatsikkut inniminnerneqarlutillu pisiarineqassammata Pissassarfimmit.

Malugiuk! Uppernarsaat ilanngullugu nassiutereeraluarit naapeqatigiissitsinermut peqataanissamik akuerisaallutilluunniit itigartitaasinnaavutit.

Linki tulliuttoq toorlugu Isumaginninnermut Aqutsisoqarfiup nittartagaanut iserlutit `ingiaqateqarsinnaanermut pisinnaatitaaffimmik qinnuteqaat`immersugassaq aajuk aamma piumasaqaataasut atuakkit:
Ingiaqateqarsinnaanermut pisinnaatitaaffimmik qinnuteqaat

Malugiuk: Isumaginninnermut Aqutsisoqarfimmut inersimasumik isiginiarnermigut ajornartorsiuteqanngitsumik ingiallorteqarsinnaatitaanermut uppernarsaat qinnutigineraniit akissutissarsinissap tungaanut sapaatip akunneri pingasut sivisusinnaammat.

Qinnuteqarnermi akissutissarsinissaq:
Piffissaq qinnuteqarfissarititaasup qaangiunneranit sapaatit akunneri marluk ingerlanerani akissutissarsissaatit.

Angalaneq aningaasartuutillu:
Peqataanermut atatillugu Pissassarfiup aningaasartuutit uku matussusissavai:
• Najukkamiit Sisimiunut uterlugulu bilitsi angalernermilu unnuiffissat ilanngutereerlugit
• Naapititsinerup ingerlanneqarnerani ineqarneq nerisaqarnerlu

Tapersersortit: tapersersortaallutik peqataasunut ineqarnermut atatillugu ullaakkorsiorneq ilaareerpoq. Pissassarfimmi ullukkut najuulluni sulinermi nerisaqarneq ilaareerpoq. Unnukkorsiorneq Pissassarfimmut attuumassuteqanngilaq.

Illoqarfimmit allamit peqataasussat naapeqatigiinnissap aallartiffissaa ullormik sioqqullugu tikissapput, naapeqatigiissitsinerlu naammassippat aqaguani aallaqqissallutik.
Malugiuk, angalatitsivinnit ullut angallavissat apeqqutaallutik tikiffissat aallarfissallu allaanerusinnaapput.

Maluginiaqquneqarpoq, bilitsit akikinnerpaat allanngortinneqarsinnaanngitsut atorneqarumaarmata. Peqataasussat bilitsinik inniminneriikkanik allannguisut taamaatitsisulluunniit nammineq aningaasartuutissat matussusissavaat, Pissassarfiup angalanermut aningaasartuutit akilereernikuummagit. Tapersersortaasoq pineqarpat sulisitsisuata aningaasartuutaasut matussusissavai.

Sisimiunut tikinnermi Pissassarfimmit aaneqassaatit.

Malugiuk: Angalanermi najukkamiit mittarfiliarnermi, kiisalu angalanermi aqqutaani illoqarfinni allani akunninnermi angallanneqarnissaq ilanngunneqanngillat. Aamma nammineq aningaasartuutissat - soorlu atisanik errorsineq, Pissassarfimmit matussuserneqarnertaaq ajorput.

Aningaasaqarneq ullormusiallu:
Pissassarfiup ullormusiat pillugit suliat akisussaaffiginngilai.
Tapersersortaasumik peqataasoqarpat, taassuma aningaasarsiai ullormusiassaalu sulisitsisup akisussaaffigivai.

Malugiuk: Tapersersortaasut ullormusiat pillugit apeqqutissallit, nammineerlutik pisortarisartik qaninneq attavigissavaat. Ingiallortimik peqataasoqartillugu, pineqartoq sulinermi annaasaqaataasinnaasut pillugit Majoriaq-mut saaffiginninnissaa innersuunneqarpoq.

Apeqqutissaqassaguit, attaviginnissannut tikilluaqqusaavutit:
• E-maili: pissassarfik@nanoq.gl
• Oqarasuaat: 34 50 70

Aamma atuaruk