Sammisaq: Atuarfinni meeqqat immikkut pisariaqartitsisut
Piffissami: Sap.ak. 43, ulluni 23.-24.-25. oktobari 2024
Sumiiffissaq: Pissassarfik, Sisimiut
Peqataasinnaasut: 20
Sullinniakkat: Atuarfimmut suliassamut immikkut ilinniarsimasunut
Qinnuteqarfissaq: Kingusinnerpaamik 13.septembari 2024 (Malugiuk: Qinnuteqarfissap ullua qaangiuppat aatsaat pikkorissarnermut peqataasussat nalunaarfigineqassammata)
Pikkorissaaneq: Pikkorissaaneq danskisut ingerlanneqassaaq oqalutseqassallunilu.
Nassuiaat:
Meeqqat eqqarsartaatsikkut peqqissuunissaat atugarissaarnerinut peqqissuunissaannullu pingaaruteqarluinnartuuvoq. Siorna piffiup ilaani eqqumaffiginiarneqarnerulersimavoq meeqqat inuusuttullu atugarissaarnerat peqqissusaallu. Pingaartumik meeqqat inuusuttullu immikkut pisariaqartitsisut akornanni, atugarissaarneq peqqinnerlu unammillernartoqarfiusoq takuneqarsinnaammat.
2020 -mi nalunaarusiaq “Kalaallit Nunaanni meeqqanut inuusuttunullu atugarliortunut pitsaanerusumik suliniuteqarnissaq pillugu kalaallit qallunaallu oqartussaasoqarfiisa assigiinngitsunik suliallit akornanni suleqatigiinneq” Naalakkersuisut aamma danskit naalakkersuisui Kalaallit Nunaanni meeqqat inuusuttullu atugarliortut atugaannik pitsanngorsaaqataasussaapput.
Nalunaarusiami erserpoq, kalaallit meerartai 1/3 -ii (pingajorarterutai) assigiinngitsunik patsiseqartumik atugarliuuteqartut.
Pikkorissaanermi uani meeqqat atugarissaarnissaat peqqissusaallu pingaartinnerullugit qaratsap qanoq sunnerneqartarneraniit sananeqaatimikkut, perorsagaanermikkut inooqataanikkullu isigalugit ersarissumik saqqummiunneqassaaq.
Ima paasillugu, meeqqat inuusuttullu atugarissaarnissaat iliuuseqarfigissagutsigu, taava qaratsamut atugarliuutit kingunerisinnaasai qitiutillugit, meeqqat imminnut naleqartinneri, nuannaarnerat neriuutaallu tapersersussavagut kiisalu peqqinneq atugarissaarnerullu qaffassarneqarnissaannut avatangiisit qanoq periarfissaqartigippat, tamanna aamma pingaartillugu qiviarneqassaaq.
Pikkorissaanermi aamma tarnip timillu nakorsaatitortitaanermi qanoq sunnerneqartarneri iserfigineqassaaq – misigisagut aqqutigalugit qanoq tarnitsinnut qaratsamut timinullu sunniuteqartarneri. Sooq naarlulertoqartarnersoq, toqqissisimajunnaarneq, anersaartornikkut ajornartorsiulernerit, uummammik kasuttoorneq, sinnarluttarnerlu tamakku pilersartut, qiviassavagut.
Eqqartussavagut qanoq iliornikkut unammillernartut taakku ikiorsersinnaanerigut, kiagulluta, illartarluta pitsaasunillu attuumassuteqarnitsigut.
Aamma ADHD -ip, ineriartornermi attaveqarniarnikkut oqaatsitigullu ajornartorsiuteqarneq (autisme) aamma annilaangasarnerup qaratsamut sunniutigisartagai – taavalu tamakku unammillernartut pillugit tamakkiisumik paaseqatigiinnitsigut, meeqqat immikkut pisariaqartitsisut pitsaanerusumik atugarissaarnerunissaat pillugu ikiorsiinissaq iserfigissavagut.
Immikkut ittumik atugarissaarnerup eqqarsartaatsikkullu peqqissuunerup qaratsamut qanoq sunniuteqartarneri pingaartumik ilikkartarnitsinnut, taannalu piginnaasanik aaliangiisinnaannginneq kiisalu silassorissutsikkut iliuuseqarsinnaaneq pingaartillugit aallunneqassapput.
Pikkorissaaneq teorimik sungiusarnermillu ingerlanneqassaaq, taamaattumik aallussinermi timerput atorlugu pitsaasumillu ataassuteqarutta atuarfimmi qanoq iliorutta meeraq ikiorluarnerusinnaaneripput eqqartorneqassaaq.
Siunertaq:
Pikkorissaanerup siunertaraa qaratsap qanoq sananeqaatimigut sunnerneqartarneranik, atugarissaarnermi, piginnaasatigut aaliangiisinnannginnermi silassorissutsikkullu iliuuseqarsinaannginnermi, ilinniartitsisunit sukumiisumik paasisaqarfigineqarnissaat siunertaavoq.
Aamma siunertaavoq ilinniartitsisut angerlaassaqassasut qaratsap sananeqaataata pissusaalu pillugit paasisimasaqarnerulernissaat kiisalu meeqqanut ilaqutaannullu ikiuinissamut sakkussaqalernissaat – massakkut piffissarlu ungasinnerusoq eqqarsaatigalugu.
Pikkorissaasoq:
Pernille Thomsen, socialpædiatrisk fysioterapeut, master i sundhedspædagogik. Piginnittuusorlu Pernillefys atuakkiortorlu: “Du skal huske at fodre din søhest”, “Børns mentale sundhed, når nervesystemet er på overarbejde” aamma “Sundhed og trivsel for børn og voksne med udviklingshandicap.
Qinnuteqarfissaq:
Peqataanissamut qinnuteqarniaraanni immersugassaq PDF-filiusoq immersoriarlugu Pissassarfiup E-mailianut nassiunneqassaaq. Malugiuk qinnuteqarfissamut killigititap ullua qaangiutereerpat aatsaat peqataasussat nalunaarfigineqassammata.
Immersugassaq PDF-filiusoq aajuk:
Immersugassaq
E-mail:
pissassarfik@nanoq.gl
Pikkorissarnissamut neqeroorut PDF-filiusoq aajuk:
Atuarfinni meeqqanik immikkut pisariaqartitsisunut sulialinnut pikkorissaanissamik neqeroorut
Angalaneq aningaasartuutillu:
Illoqarfimmit allamit peqataasussat pikkorissarnerup allartiffissaa ullormik sioqqullugu tikissapput, pikkorissarnerlu naammassippat aqaguani aallaqqillutik. Taamaakkaluartoq angalatitsivinnit ullut angallavissat apeqqutaallutik tikiffissat aallarfissallu allaanerusinnaapput.
Najugarisamiit Sisimiunut uterlugu billetsi, ineqarneq ullaakkorsiorneq ilanngullugu ullunilu pikkorissarfinni ulloqeqqasiorneq Pissassarfiup isumagissavai.
Malugiuk: billetsit akikinnerit allanngortissinnaanngitsullu atorneqassapput. Taamaammat billetsinik allannguinermi taamaatitsinermiluunniit Pissassarfiup angalanermut aningaasartuutai, pikkorissartussap sulisitsisuata matussusissavai.
Angalanermi aningaasartuutit ass. taxarneq ullormusiallu Pissassarfimmut attuumassuteqanngillat.
Apeqqutissaqartoqarpat uunga apeqqutigineqassapput:
Pissassarfik@nanoq.gl imalt. oqarasuaat. 34 50 70