Nuna tamakkerlugu inunnik innarluutilinnik Pissassarfimmi naapeqatigiissitsineq: Inersimasut ADHD-qartut

Naapeqatigiinneq Pissassarfimmi ingerlanneqarpoq ulluni: 9.-10.-11. Oktoberi 2023

Inersimasutut ADHD-qarluni ulluinnaat inuuniarnerlu assigiinngitsutigut sunnerneqartarpoq, imminullu paasilluarnissaq; minnerunngitsumillu avatangiisinit paasineqarnissaq pingaaruteqarpoq. Naapeqatigiinnermi ilaatigut makku ilisimatuussutsikkut misilittakkatigullu ilisimasat sammineqarput: 

• Inersimasunngoreerluni ADHD-qarnermi atungassarititat  qanoq ittuuppat? 
• Paasiaarsimagaanni paasiaarsimanngikkaannilu sunniutaasartut suuppat? 
• ADHD qaratsatsinni suua?, suut sunniutaappat? 
• ADHD nammineq atugaralugu qanoq ippa? 


Saniatigut sammineqarput inuiaqatigiinni ADHD pillugu isornartorsiuinermik isiginnittarneq, qanorlu allat apeqqutigisartagaat aamma isiginnittariaasii killilerneqarsinnaanersut. Minnerunngitsumillu inersimasunut ADHD-qartunut iliuusissat iluaqutaasinnaasut eqqartorneqarput. 

Naapeqatigiissitsineq Niina Petersen Tarnip pissusaanik immikkut ilisimasalik suleqatigalugu ingerlanneqarpoq.

Malugiuk: Ukiumi nutaami naapeqatigiissitsineq pillugu filmiaraq saqqummersissagatsigu.