Tapersersortit innuttaasunut qaratsamikkut ajoqusersimasunut sullissisuusut Pissassarfimmi pikkorissaqqammerput

Sammisaq: Timimi sianiutit pissusaannut tunngasoq/-sut Neuropsykologi

Assi: Pikkorissarnermi peqataasut, pikkorissaasut: Anne Norup Ph.d Specialist i klinisk neuropsykologi - Videncenter for Neurorehabilitering, Rigshospitalet, Glostrup & Jytte Kjærgaard IsaksenPh.d. audiologopæd - Lektori Syddansk Universitet, Det Humanitiske Fakultet Institut for Kultur- og sprogvidenskaber oqalutsillu: ArnaK`Hendriksen Karlsen & Birgithe Christensen Pikkorissartut suminngaanneerfii: Qaanaaq, Upernavik, Aasiaat, Qasigiannguit, Sisimiut, Maniitsoq, Nuuk, Tasiilaq, Paamiut, Narsaq. 

Qaratsami taqqatigut milikartoornermik, aanaartoornermik imaluunniit ajutoornerup kingunerisaanik qaratsakkut innarlersimasunut tapersersortaasut aamma qanimut sullissisut nunatsinni sumiiffinni assigiinngitsuneersut Pissassarfimmi pikkorissarput ulluni 9.-10. aamma 11. apriili 2025.

Pikkorissarnermi sammineqartut.

Sammineqartut ilagivaat qaratsap qanoq atuuteqarnera, nappaatit qaratsamut qanoq sunniuteqartarneri, qaratsakkut innarlersimanerup kingunerisaanik ersiutit, qaratsakkut innarlersimasunik ulluinnarni sullissinermi sapinngisamik qanoq ikorfartuisoqarlunilu attaveqartoqarsinnaanera.
Inunnguuserinagu qaratsakkut ajoquserneq nalaanneqaraangat ilaatigut makku kingunerluutaasaarput:

• Timimik atuinermi ajornartorsiuteqarneq
• Misigissutsitigut aamma inuttut pissutsitigut allannguuteqarneq
• Inooqatigiinnikkut aamma pissusilersornikkut allannguuteqarneq
• Eqqarsartaatsikkut ajornartorsiuteqarneq

Qaratsakkut ajoquserneq inuunermi sutigut tamatigut allannguisinnaavoq soorlu aningaasaqarnikkut, suliffimmik/ sammisanik annaasaqarneq aamma ilaqutariinni allanngortoqarneq. Imaappoq ulluinnarni ikorneqarnissamik tapersersorneqarnissamik isumassorneqarnissamillu pisariaqartitsilerneq pilersarpoq.

Qaratsakkut innarlernerit amerlanertigut ataavartuusarput, amerlasuulli piffissap ingerlanerani ilaatigut qaangiisarput. Pikkorissarnermi aamma sammineqarpoq ajoqusersimalluni eqqugaasup iliuuserisarsimasaasa piginnaasatigut annikillisimasut taartissaanik ikiornissaa, soorlu iliuusissanik nutaanik atuilernissaanut, atortunik ikiuutinik atuinissaanut, attaveqariaatsinik, aamma ileqqorisaanik allannguinissaanut maanna piffissami killiffianut tulluuttumik. 

Aamma sammineqartut ilagivaat qaratsakkut innarlersimasumut qanigisaasut qanoq ikiorneqarsinnaaneri, qaratsakkut  ajoqusersimasumut ilaqutaasut eqqarsartaatsikkut aamma timikkut kingunerlutsitsisarmata. Ukkatarineqarpoq sulisoq qanoq ililluni piffissaliilluni sullissinissamut pilersaarusiorsinnaanera, pitsaanerpaamik innuttaasoq sullikkumallugu killiffia, inuiaqatigiinnilu pissutsit aallaavigalugit.  

Ilaatigut sulisutut sulinermut atatillugu nalaatsinerlunnermi qisuariaatsit kingunerluutillu assigiinngitsut nalaanneqarsinnaasarput. Taamaattumik aamma sammineqarpoq imminut paarinissap pingaaruteqarluinnarnera.  Sulinerup avataatigut ulluinnarni soqutigisanik aallussinissap pingaaruteqarluinnarnera, ulluinnarni imminut iluarisimaartitsisinnaasunik, timikkut, misigissutsitigut aamma eqqarsartaatsikkut nukittulluni sulissagaanni.

Pikkorissarneq naggaserlugu ‘aalisartut issiavinnaavat’ misilinneqarpoq. Tassani sulisut suleqatigiit akunnerminni sullitatik pillugit qanoq avitseqatigiillutik eqqartuisinnaanertik, aamma qanoq paasisaminnik nutaanik ingerlatitseqqiisinnaanertik misilittarpaat.

Pikkorissarnermi assit:

Pikkorissaasoq:
Anne Norup
 Ph.d Specialist i klinisk neuropsykologi - Videncenter for Neurorehabilitering, Rigshospitalet, Glostrup.

Pikkorissaasoq:
Jytte Kjærgaard Isaksen
​Ph.d. audiologopæd - Lektori Syddansk Universitet, Det Humanitiske Fakultet Institut for Kultur- og sprogvidenskaber

Aamma atuaruk