airplanebooksbriefcase business cogs cross election entertainment fish house law lockmedicalpeopleselfservices socialtax

Pissassarfiup angalasartui Narsamut aamma Qaqortumut angalaqqammerput

1. maj 2024
Pissassarfik

Pissassarfimmi atorfillit sisamat: Nuna tamakkerlugu pillorissaanermi immikkut akisussaasut marluk, perorsaasoq, aamma Nuna tamakkerlugu timimik sungiusaanermi immikkut akisussaasoq nutserisorlu piffissami 25.- 30. Apriili 2024 Narsamiillutillu Qaqortumiipput.

Narsami kommunimi sullissisoq naapinneqarpoq, najugaqatigiiffik pulaarneqarluni aamma  pissassariarsimasunut malitseqartitsilluni angerlarsimaffimmut ornigulluni killiffissiuisoqarpoq.  Ullullu marluk workshop ingerlanneqarluni.

Qaqortumi kommunimi sullissisut pingasut naapinneqarput, atuarfik aamma Ivaaqqami immikkoortortaqarfiit marluk pulaarneqarput, ullunilu marlunni workshop ingerlanneqarluni.

Pilersaarutit malillugit Nanortalik tikinneqartussaq angallanneq pissutaalluni tikinneqanngitsoorpoq. Kingusinnerusukkut Pissassarfimmi angalasartut Nanortalimmi sullissisoq attaveqaatitigut video aqqutigalugu naapeqatigineqarpoq.

Narsami Qaqortumilu ullut marluk workshop ingerlanneqarpoq, sammillugu: Meeqqat inuusuttullu autismeqartut imaluunniit ADHD-qartut.
Workshop ulluni marlunni ingerlanneqarnerani sammineqarput:

• Innarluutit/ nappaatit suussusiannik paasissutissiineq
• Autisme aamma ADHD assigiinngissusaat
• Maluginiutit pissusilersuutinut isumaat
• Attuumassuteqarfigisanut ilisarititsineq, perorsaasutut sulineq aamma sunniiveqatigiinneq
• Inooqatigiinnermi sunniiveqatigiinneq aamma inooqatigiinnermi attaveqaqatigiinneq
• Ulluinnarni ilusilersuineq aamma pilersaarusiorneq
• Teori aamma ilisimasat persorsaasutut sulinermi timitalersinnaaneri

Workshop ingerlanneqarnerani sullissisut, tapersersortit aamma angajoqqaat qanigisaasullu peqataapput. Pitsaasumillu iluaqutaasinnaasunik oqallittoqarpoq.


“Saqqummiineq imaqarluartumik ingerlavoq, taakkunanilu ulluni marlunni susassareqatigiit illoqarfigisaminni killiffitsik aallaavigalugu oqallittoqarluni ingerlanneqararnerani peqataasut tungaanniit oqalliseqataalluarlutik peqataalluarput.
Meeqqat inuusuttullu autismeqartut imaluunniit ADHD-qartut pillugit, ersinngitsumik innarluuteqarsinnaanerat eqqarsaatigalugu ilisimasassat pingaaruteqartut attuumassuteqarfigisanut ingerlateqqinnerani, ulluinnarni ingerlariusigineqartut, ullumikkullu inuiaqatigiinni isiginnittaaseq pingaaruteqartoq meeqqamut inuusuttumullu ineriartuutaasinnaasoq eqqartorneqarpoq.
Ataatsimut susassareqatigiit peqataanerat isigissagaanni, autismeqartut aamma ADHD-qartut pillugit ilisimalikkat, ulluinnarnilu ilisimasassat pingaaruteqartut tunniussornerani, susassareqatigiit ataatsimut kivitseqatigiittarnissaat pingaaruteqartutut eqqartoreernerani, saqqummiisutut neriuutigivara ilisimalikkat atorluarlugillu ataatsimoorussamik timitaliiffigilluartalerumaaraat”.
-Kuuna Inûsugtok`, perorsaasoq

 Narsami Qaqortumilu workshopimut peqataasut oqaaseqaataat:
”Iluarisimaarnarpoq”

Paasisat:
• Kingornuttagaanera
• Avatangiisit qisuariaataasa pingaaruteqarnerat
• Suleqatigiilernermi periusaasinnaasut
• Sioqqullugu piareersarsimanissaq

-Aannguaq Poulsen

“Ajunngilaq, uggornaqaarlu tuaviinnaq sukkaannaq ingerlanneqarmat. Kisianni qujanaq taama pisoqartoq, amerlaneroqqorusunnaqaat taamaattut paasissutissat. Pissarseqaanga immikkoortissinnaanerinut aammalu itinerusumik paasillugit iluaqaaq. Eqqarsalersitseqaaq assut angajulliup pissusai ilisarnarsisut iliuuseqarnissarlu orniginarnerulerpoq, kisimiigani paasillugu iluaqaaq”

Kissaatigisat:
• Paasissutissiissutit ingerlaartilluarnissai
• Qaammarsaalluarneq annertooq iluaqutaassaaq aallartillugu

-Arnanguak Petersen, angajoqqaaq


“Torrak paasisaqarpunga, avaarnanngilaq. Suli aamma periarfissaq, torrak”

-Aviaja J., angajoqqaaq
“ Workshop iluareqaara, aamma nerrivimmi sakkussaasinnaasut nutaat ilisimalerneri, nutaanillu nerrivimmiittunik piniarnissamut iluaqitaasinnaasinik pissarsinarpoq. Saqqummiussinerlu paasinaqaaq. Saqqummiisumiit aammalu angajoqqaat angerlarsimaffimmini atugaat paasisaqarnaqaat.

Paasisat:
• ADHD “aalaannaavissut” ukkassisinnaanertik ajornartorsiutigisinnaasarpaat
• Autistertullu aalajangersimaffaarissumik malitassaqartarneri
• Ulluinnarni angerlarsimaffimmi oqaatsit pissutsillu suut atorneqartarneri ADHD-qartuni
• Pisiniarfinni utaqqisinnaannginneq, ingerlaannartariaqartarneq
• Ujamit qanoq pingaaruteqarsimaneri qanorlu isumaqarneri

-Børnehave Narsaq, sulisoq
“Kalaallisut ingerlanera qamuunavik nuannaarutigivara, saqqummiussat paasinarluarmata nuannaarutigivara. Gruppertarnitta immersuutaalluarnera nuannaarutigivara. Tuaviuussaaneraraluaraa paasinarluarmata nuannaarutigaara. Pissarsiarpassuaqarpunga saqqummiisumiit, angajoqqaat saqqummiussaanit”

Paasisat:
• Nalunaaqutaq qanoq naalagaatiginera
• Sininniarnermut ikiuutaasartut
• Maluginiutit
• Ilusilersuineq
• Aaqqissuussaaneq
• Ulluinnarni piareersarneq
• Apeqqutit ammasut
• Pilersaarutit assiliartalersukkat (piktogrammit)
• Sap. Ak. Pilersaarusiornissaq

-Emma Stach, Meeqqerivik Narsarmiutaq
”Iluaqaaq paasineqarsinnaalluni, paasisaqaqatigiissinnaallunilu. Kisimiinnanga paaseqqippara, taavalu Pissassarfik paasinerulaarlugu. Iluarujussuarpoq paasillugu kisimiinnata angajoqqaatut peqataanermi. Misiginaannarami sivikinaarsilluni, eqqartugassat amerlatsittaramik. Piffissaq annikinaarnarsilluni. Workshoppertitsisarneq akuttusariaqarsorinanngikkaluaqaaq”

-Paninguak`G-Motzfeldt, anaanaasoq Infantil Autisme aamma ADHD-qartunut

Aamma atuaruk

Qarasaasianni paasissutissat ilaat atoqqissinnaajumallugit quppernermi matumani cookie't atorneqartarput. Akueriuk annertunerusumilluunniit uani paasisaqarit.