ArnaK` Henriksen Karlsen 1. Juni 2024 ukiuni tallimani oqalutsitut Pissassarfimmi sulisimalerpoq. Nalliuttorsiorneranut atatillugu Pissassarfiup pisortaanit qujassuteqarfigineqarluni tunissuteqarfigineqarpoq.
ArnaK`Pissassarfimmi sulianut tunngatillugu nutserisuuvoq. Pissassarfimmi pissassartoqartillugu, pikkorissarnerit ingerlanneqarneranni aamma Pissassarfiup angalasartuisa angalaneranni oqalutsitut, nutseraluni tunniusimalluinnarluni ukiuni taakkunani suleqataavoq.
“ukiut sukkasimaqaat, misigisat nuannersorpassuupput. Sullittakkagut nuannersut, ilaatigut atugaat imaannaanngittaraluaqisut pissassarnerminni pissarsiaqarsimallutik naammassigaangata uannut kissalaarnermik nuannaarnermik aamma pilluarnermik tunisisarput. Suleqatit piffissallu ingerlanerani suleqatigisimasat nuannersut, illarumatuut, ilakkuminartut nukissanik tunioraajuartut qujanaqaat. Suliartornissaq qilanaarnartuaannarpoq.”
ArnaK´ilaqutaalu nalliuttorsiornerani Pissassarfimmit pilluaqquarput