airplanebooksbriefcase business cogs cross election entertainment fish house law lockmedicalpeopleselfservices socialtax

Meeqqat innarluutillit angajoqqaavi aamma angajoqqaat sinnerlugit nakkutiginnittut Pissassarfimmi naapeqatigeeqqammerput

13. juni 2024
Pissassarfik

Assi: Pissassarfimmi naapeqatigiissitsinermit

Upernaaq manna nuna tamakkerlugu inuit innarluutillit naapeqatigiissinneqarneranni meeqqat innarluutillit angajoqqaavi imaluunniit angajoqqaat sinnerlugit nakkutiginnittut 17-it naapeqatigiissinneqarput ulluni pingasuni 29.-31. maaji 2024

Naapeqatigiissitsinermi sammineqarpoq: “timikkut isumaliortaatsikkullu innarluutilimmik qitornaqarnermi angajoqqaatut misigissutsikkut inooqataanermilu oqimaassinnaasunik atugaqartitsisarnera.”

Innarluutilimmik qitornaqarnermi misigissutsikkut sakkortuumik eqquisinnaasarpoq, tamannalu eqqumaffiginngikkaanni imminermut, ilaqutariinnermut inuiaqatigiinnut aammalu pisortanut kalluaasinnaasarpoq.

Angajoqqaatut imaluunniit angajoqqaat sinnerlugit nakkutiginnittutut eqqarsaatersuutigineqakulasarpoq siunissami qanoq pisoqarumaarnera aamma pisuusutut misigineq imminullu assuarlerneq. Meeqqamut nalliginninneq peqqutaalluni killiliisinnaaneq ajornakusoortinneqalertarpoq taamaasilluni ilaatigut meeqqamut akisussaaffiiaanermik kinguneqartarluni.

Aamma ilaatigut meeqqamut innarluutilimmut angajoqqaajulluni killeqalersinnaasarpoq, tassa qatanngutaasut pisariaqartitaannik tunniussaqarnissaq eqqumaffigineqanngitsoorsinnaasarmat. Angajoqqaatut, angajoqqaat sinnerlugit nakkutiginnittutut aammattaaq inooqatigiinnermi ajornartorsiutit aamma ilaqutariinni ajornartorsiutit pilersinnaasarput.

Pisortanit sullinneqarneq misigissutsikkut nukinnik atuinarsinnaavoq, aamma angajoqqaatut imaluunniit angajoqqaat sinnerlugit nakkutiginnittutut eqqortumik sullinneqarnissaq pingaaruteqarpoq, tamakkuupput naapeqatigiinnermi eqqartorneqartut ilaat.

Naapeqatigiinnermi ataatsimoorluni aamma eqimattakkaarluni oqallinneq ingerlanneqarpoq, atukkanik avitseqatigiinneq, siunnersoqatigiinneq ingerlanneqarpoq.

Pingaarnertut sammineqarpoq imminut aallaavigaluni,  imminut naalaarluni killiffissiorsinnaanerup pingaaruteqassusaa. Imminullu aallaavigaluni qiviarluni ulluinnarisat ingerlanneqarsinnaanerannut peqataasut sakkussarsipput. 

Naapeqatigiissitsineq psykoterapeut Elisabeth P. Wille suleqatigalugu kalaallisut ingerlanneqarpoq.


Naapeqatigiissitsinermi peqataasut oqaaseqaataat/ aamma assit ataani takukkit: 





"Pissassarfimmi naapisitsineq isumalerujussuuvoq - pisariaqarluinnarneralu paasinarsilluni!"

– Elisabeth P. Wille, psykoterapeut














“Manna naapeqatigiissitsineq nuannerlunilu iluarisimaarnarpoq, timikkut innarluutilimmut angajoqqaajulluni.

Ulluinnarni atukkat pillugit angajoqqaaqatit qanimut naapillugit paaseqatigiissinnaalluni nuannerpoq.”

Anja J. Skifte- Maniitsoq















“Nipangiusimasussaatitaaneq aallaqqaataaniit ersarissarneqarmat assut iluarisimaarpara. Taamaasillunga ilisimasariinngikkaluarluta ammaanneqartutut misigisimavunga. Nangaassuteqarnanga paquminarsinnaasunik eqqartuisinnaallunga. Aamma Paasillugu kisimiinnanga allanik aviteqateqarnera ataatsimoornitsinni iluarisimaaqaara. Aamma ulluinnarisatsinni atukkatsinni aqqutissiuunneqartutut misigiffigivara.”

Tabitha Rosing- Maniitsoq












”Pissassarfimmiinninni ersinngitsumik innarluutilimmut qanigisaasutut peqataanera ugguarinngeqaara, pissarsianik ulikkaarpunga, paaseqqiinnarpara kisimiinnata ersinngitsumik innarluutilimmik meerallit. Meeqqatta qisuariaataannut misigisartakkagut assigeerrapput. Avitseqatigiinnerput iluarisimaaqaara, innersuunnaqaaq ingerlanneqartuarnissaa. Taamaattoqassappat peqataaqqissinnaavunga."

-Naja Kristine Lundblad, Nuuk







“Anguterpassuit peqataanitsinni akornatsinni oqaaseqarsinnaanerput ikorfartoqatigiinnerpullu assut qanillinarpoq. Oqaloqatigiinnerput oqinaarpara, anguterpassuugatta oqinaarnarpoq.

Angutit amerlanerusut taamatut peqataalluartarnissaat kissaatiginarpoq. Arnat misigissusilerillaqqimmata oqaloqatigalugit oqimaallisarmata. Anguteqatinik oqaloqateqarluni killiffimmi iluaqimmat. Naapisitsisoq kalaaliugami iluaqaaq. Qujanarlu taamatut peqataaninnut, siullermeerama killiffiga takunaqaaq.”

- Hanseeraq Olsen, Qeqertarsuaq (Saamerlermi inissisimasoq)

“Pissassarsiaqarnarpoq, tarrarsorfippassuaqarnarlunilu. Qujamasunnarpoq taamatut periarfissinneqarneq, neriuppunga kingulliussanngitsoq. Allaanngilaq qangali ilisimariikkat ilangiinnarlugit.”

-Kuutak Reimer Olsen, Nuuk (talerperlemi inissisimasoq)








“Periarfissaq atorluaruk kisimiinngilatit”

- Sofie J. Hansen, Maniitsoq










 

 

Naapeqatigiissitsinermi assit:






“Taamaattunik ikattunik! Toqqorterinani kiinappaqarani annissuisinnaalluni, qanorluunniit oqalussinnaalluni, inuk nalugaluarlugu tatigineqarluni, tatigalugit iluaq. Gruppemi oqaloqatigiissinnaalluni tusarnaarneqarluni oqik, iluaq. Taamaammat taamaattunik ikattunik allanut piukkunnaqaaq.- Imminut qiviarluni allat oqaloqatigilluarsinnaallugit oqaasertaleruminaappoq, qujanaq periarfissamut.”

-Maannguaq D. Skifte, Qeqertarsuaq







Assi: Naapeqatigiissitsinermi  angajoqqaat aamma angajoqqaat sinnerlugit nakkutiginnittut 17-init peqataapput Ilulissaniit, Qeqertarsuarmiit, Aasianniit, Maniitsumiit Nuummiillu
- Assiliisoq/allaaserinnittoq: Daana R. Geisler, attaveqaqatigiinnermut sulisoq Pissassarfik

Aamma atuaruk

Qarasaasianni paasissutissat ilaat atoqqissinnaajumallugit quppernermi matumani cookie't atorneqartarput. Akueriuk annertunerusumilluunniit uani paasisaqarit.