Uani sapaatip akunnerani ukkatarineqarpoq inuit innarluutillit ulluinnarni inuunerminni naleqartitaat ilaatigut ulluinnarni inuunerisami ingerlalluarneq nammineersinnaanerulernerlu.
Innarluuteqarnerup ulluinnarisat assigiinngitsorpassuartigut sunnersinnaasarpai, piginnaasakillinermi ilaatigut inuup ajornakusoortilertarpaa ulluinnarni suliarisartakkami naammassiniarnissai, taamaasillunilu nammineersinnaalluarnini annaasarlugu. Inummut innarluutilimmut tamanna allanit ikiorneqarnissamik pisariaqartitsilernermik kinguneqarsinnaavoq, taamaasilluni amerlasuut nalaattarpaat pitsaanngitsumik inooriaatsimik sunnerneqarnerat.
Sungiusarneq, atortut ikiuutit, ilitsersuineq aamma siunnersuineq inunnut innarluutilinnut annertuumik allanngueqataasinnaapput.
Innuttaasutut innarluutilittut ilinnut tulluarsakkamik sungiusarnermik – ilitsersorneqarnissamillu Pissassarfimmut innersuunneqarnissamik periarfissaqarputit, imminut ikiorsinnaanerulernissat inuunivillu pitsanngorsarnissaa ukkataralugit.
Pissassariarnissamik kissaateqaruit SULLISSIVIK aqqutigalugu qinnuteqarsinnaavutit imaluunniit sullissisorisat saaffigalugu, taassuma Pissassarfimmut innersuussineq ingerlatissavaa.
Pissassarfik innarluuteqarneq pillugu akeqanngitsumik siunnersuisarpoq, tamanna pisinnaavoq oqarasuaat, maili aqqutigalugit imaluunniit ornigulluni saaffiginninnikkut.
Pissassarfimmut saaffiginnissinnaavutit maili aqqutigalugu pissassarfik@nanoq.gl imaluunniit oqarasuaat aqqutigalugu 34 50 70.